Монгол Улсад хүүхдийн байгууллага, хөдөлгөөн үүсэж, хөгжсөний 100 жилийн ой, Дэлхийн хүүхдийн өдрийг угтан зохион байгуулж буй “Хүүхэд-Хайр-Ирээдүй” Хүүхдийн үндэсний чуулган маргааш Төрийн ордны Их танхимд болно.
Хүүхдийн үндэсний чуулганд Монгол Улсын 21 аймаг, 330 сум, 9 дүүргийг төлөөлж, 13-17 насны 800 хүүхэд оролцож байгаагаас 88 хувь нь орон нутгаас, 12 хувь нь нийслэлээс оролцож байна.
Хүүхдүүд маань Олон Улсын хүүхдийн Найрамдал цогцолборт байрлан бүлгийн хэлэлцүүлэг, олон талт арга хэмжээнд оролцож, дотроосоо маргаашийн чуулганд илтгэгчээр оролцох хүүхдийг ур чадвараар нь нээлттэй сонгон шалгаруулан гэр бүл, боловсрол, сэтгэлзүйн эрүүл мэнд, оролцоо, цахим хэрэглээ сэдвийн хүрээнд илтгэл хэлэлцүүлэхээр ажиллаж байна.
Шинэ зуун жилд монгол хүүхдүүдийн хүсэл эрмэлзэл, үнэт зүйл, зорилгын талаарх санал, шийдлийг шийдвэр гаргах түвшинд хүргэж, цаашид батлагдах төрийн хууль, тогтоомжид тусгуулах нь тус чуулганы зорилго юм.
