Нийслэлийн Жижиг, дунд үйлдвэр, үйлчилгээг дэмжих төв НӨҮГ-аас “SME Forum-2025” хэлэлцүүлгийг энэ сарын 13-ны өдөр зохион байгууллаа. Энэ үеэр жижиг, дунд үйлдвэрлэлийн салбарт шаардлагатай хууль, эрх зүйн орчныг сайжруулах, бизнес эрхлэгчдийг дэмжих бодлогын чиглэлүүдийг хөгжүүлэх, хамтын ажиллагааг өргөжүүлэхээр оролцогчид санал солилцлоо.

Тус форумд Монгол Улсын Ерөнхийлөгчийн Үйлдвэр, үйлчилгээний бодлогын зөвлөх Ч.Даваабаяр, нийслэлийн Засаг даргын Үйлдвэр, үйлчилгээний бодлогын зөвлөх О.Оргил, НЖДҮҮДТ НӨҮГ-ын дарга Д.Ундармаа, Гэр бүл, хөгжил, нийгмийн хамгааллын яамны газрын ахлах шинжээч Г.Наранбаяр болон МХАҮТ, Худалдаа хөгжлийн банкны төлөөлөгчид, нийслэлийн есөн дүүргийн ЖДҮ-ийн төвийн удирдлага, албан хаагчид, ЖДҮ эрхлэгчдийн төлөөлөл зэрэг 120 орчим хүн оролцсон юм.

Форум гурван хэсэгтэй зохион байгуулагдав.

Нэгдүгээр хэсэгт НЖДҮҮДТ болон нийслэлийн өмчит үйлдвэрийн газрын 2025 онд хэрэгжүүлсэн үйл ажиллагааны үр дүн, төсөл хөтөлбөрийн хэрэгжилтийг танилцууллаа.

Хоёрдугаар хэсэгт нийслэлийн есөн дүүргийн ЖДҮ эрхлэгчид төрийн байгууллагын төлөөлөлтэй санал хүсэлтээ солилцож, хэрэгцээ, тулгамдсан асуудлынхаа талаар асуулт асууж, мэргэжлийн зөвлөгөө авсан.

Гуравдугаар хэсэгт Монгол–Америкийн бизнес эрхлэгчдийн Очир төв ЖДҮ эрхлэгчдэд АНУ-ын зах зээлд бүтээгдэхүүнээ экспортлох боломж, шаардлагатай алхмуудын талаар мэдээлэл өгч, мөн Худалдаа хөгжлийн банкнаас ЖДҮ-ийн зээл болон бусад дэмжлэгийн талаарх танилцуулга хийв.

Форумын үр дүнд ЖДҮ эрхлэгчдээс гарсан санал хүсэлтийг бодлогын түвшинд тусган, ирэх оны ажлын төлөвлөгөөнд багтаахаар болов.