Нийслэлийн газар зохион байгуулалтын албанаас газрын харилцааны үйлчилгээг бүрэн цахимжуулахаар болсон байна.

Тодруулбал, иргэд газар эзэмших, өмчлөх, ашиглах эрхтэй холбоотой мэдээллийг www.egazar.gov.mn цахим сайтаар дамжуулж авах ажээ. Газрын тухай хууль болон Газар эзэмших, ашиглах эрхийн гэрчилгээ олгох журамд заасны дагуу иргэн, аж ахуйн нэгж, байгууллагаас ирүүлсэн шинээр газар эзэмших, ашиглах эрх олгох, гэрчилгээг бусдад шилжүүлэх, хугацаа сунгах, газрын зориулалт өөрчлөх гэх мэт хүсэлтийг цахимаар хүлээн авч, төрлөөс хамааран 1-15 хоногт шийдвэрлэх боломжийг бүрдүүлжээ.

Үүнд, иргэн, хуулийн этгээд нь газартай холбоотой хүсэлтийг www.egazar.gov.mn, гар утасны аппликейшн, газрын харилцааны үйлчилгээний цахим машин, emongolia-гаар дамжуулан гаргаж авна. Мөн гэр бүлийн хамтын хэрэгцээнд зориулан үнэ төлбөргүй газар эзэмшүүлэх хүсэлтийг ажлын тав хоногийн дотор шийдвэрлэх аж. Үүнээс гадна гэр бүлийн хамтын хэрэгцээний зориулалтаас бусад зориулалтаар газар эзэмших, ашиглах эрхийн гэрчилгээ олгох хүсэлт, сунгалтыг тав хоногт багтаан шийдэж өгөх аж.

Харин газар эзэмших эрхийг бусдад шилжүүлэхийг ажлын 15, иргэн, аж ахуйн нэгж, байгууллагын нэр өөрчилснийг бүртгэх хүсэлтийг нэг хоногийн дотор шийдвэрлэх бөгөөд барьцааны бүртгэл, тусгай тэмдэглэгээ хийх, эзэмшиж буй газраа бусдад ашиглуулах хүсэлтийг ажлын нэг хоногийн дотор шийдвэрлэх ажээ.