Өнөөдөр улс орон даяар шинжлэх ухаан, урлаг соёлын олон арга хэмжээ, хэвлэлийн уулзалтууд болохоор төлөвлөгджээ.

МҮЭ-ийн холбооны ерөнхийлөгч Э.Тамир 08:00 цагт сэтгүүлчидтэй “Өглөөний уулзалт” хийж, хөдөлмөр, нийгмийн асуудлаар мэдээлэл өгнө.

10:00 цагт УИХ-ын чуулганы нэгдсэн хуралдаан эхэлж, хууль тогтоох ажлын талаар хэлэлцэнэ. Мөн ШУА-ийн Түүх угсаатны зүйн хүрээлэн “Нээлттэй хаалганы өдөр”-өө зохион байгуулна.

11:00 цагт Хангарди ордонд “Шар дарцаг” аян болон ХЭҮК-аас “Хүний хувийн мэдээлэл хамгаалах үйл ажиллагаа”-ны талаар тус тус мэдээлэл өгнө.

14:00 цагт ШУА-д Монгол-Японы хамтарсан “Бичээс” төслийн баг хятан бичгийн шинэ хадны бичээсийн талаар танилцуулна.

Мөн ХЗДХЯ-нд аймаг, нийслэлийн ЗДТГ-ын хууль, эрх зүйн хэлтсийн дарга, мэргэжилтнүүдэд зориулсан сургалт болно. Спортын талбарт волейбол, сагсан бөмбөгийн дээд лигийн тоглолтууд үргэлжилнэ.

Соёл, урлагийн салбарт “Үгүйлэгдсэн хайр”, “Сүүлчийн бороо” жүжгүүд тайзнаа тоглогдож, “Бидний хооронд”, “Анагаагч эх дэлхий”, “Би”, “Огторгуйн охид”, “Алтан намар” зэрэг үзэсгэлэнгүүд олны хүртээл болсоор байна.

Орон нутагт

Хөвсгөлд “Дэлгэц дүүрэн аялгуу” киноны дууны уралдаан, Архангайд “Дэлхийн чанарын өдөр” өдөрлөг, Өмнөговьд “Үзэсгэлэнт говь” үзэсгэлэн, Ховдод соёлын дурсгалын улсын тооллого үргэлжилж байна.

Хилийн чанад дахь Монгол уран бүтээлчдийн үзэсгэлэнгүүд Египет, Португал, Швейцарт үргэлжилж байгаа бөгөөд Каирт буудлагын дэлхийн аварга шалгаруулах тэмцээн болж байна.