Монгол Улсад хөрш орнуудаас ирсэн жуулчдын тоо цар тахлын өмнөх үеийнхээс 80 хувиар нэмэгджээ.
Манай улсад өнгөрсөн онд гадаадын 727 400 жуулчин ирсний 30.4 хувийг БНХАУ, 26.2 хувийг ОХУ-ын жуулчид эзэлж байна. Энэ нь Монгол, Хятад, Оросын аялал жуулчлалын сайд нарын хуралдааныг 2016 оноос хойш уламжлал болгон зохион байгуулсан, гурван талт хамтын ажиллагааны бодит үр дүн гэдгийг салбарын төлөөлөгчид онцолсныг Соёл, спорт, аялал жуулчлал, залуучуудын яам мэдээлэв.
Дээрх улсын аялал жуулчлалын сайд нарын есдүгээр хуралдаан Дархан-Уул аймгийн Дархан хотноо болж, “Цайны зам ба эдийн засгийн коридор” гурван талт уулзалт зохион байгуулах үеэр сайд Ч.Ундрам энэхүү уулзалт нь хамтын ажиллагааг шинэ шатанд гаргах чухал алхам болохыг тодотгов. Мөн талууд Монгол, Хятад, Оросын “Эдийн засгийн коридор байгуулах хөтөлбөр”-ийг 2031 он хүртэл сунгах, худалдаа, эдийн засаг, дэд бүтэц, байгаль орчин, аялал жуулчлал зэрэг салбарын хамтын ажиллагааг эрчимжүүлэх талаар санал солилцож, хамтын ажиллагааг гүнзгийрүүлэх нөхцөлийг бүрдүүлж байгаа юм.
Энэ удаагийн уулзалтаар гурван улсын худалдаа, соёл, иргэншлийг долоон зуун жилийн турш холбосон “Цайны зам”-ын түүхэн аялал жуулчлалын үнэ цэнийг онцолж байна. “Цайны зам”-ын аялал жуулчлалын хамтын ажиллагааг идэвхжүүлэх хүрээнд хөрш орнуудын төр, хувийн хэвшлийн аж ахуйн нэгжүүдтэй хамтран брэнд авто аяллын хөтөлбөрийг харилцан хөгжүүлэх зорилтыг дэвшүүлжээ.
