Нийслэлийн Чингэлтэй дүүргийн 21 дүгээр хороонд байрладаг “Эко Хаб” тогтвортой хог хаягдлын төвлөрсөн байгууламжтай боллоо.
НЗДТГ-ын мэдээлснээр, уг төв өдөрт 150 тонн ангилан ялгасан хог хаягдлыг хүлээн авч, дахин боловсруулах үйлдвэрүүд рүү шууд нийлүүлэх хүчин чадалтай юм. Европын санхүүжилтээр хэрэгжүүлж буй “Эко Хаб” төсөл нь хуванцар, цаас, шил, лааз зэрэг дахин боловсруулах боломжтой хог хаягдлыг цуглуулж, шахаж бэлтгэн цаашдын боловсруулах сүлжээнд нийлүүлнэ. Ингэснээр хогийн цэг рүү очиж булагдах хог хаягдлын хэмжээг бууруулж, тойрог эдийн засгийн зарчмыг бодитоор хэрэгжүүлэх цогц экосистем бүхий төв болж байна. Нэг дүүрэг өдөрт дунджаар 300-350 тонн хог хаягдлыг хогийн цэг рүү ачуулдаг тул Эко Хаб нь гурван дүүргээс өдөрт 150 тонн ангилсан хог хаягдлыг хүлээн авах замаар хогийн цэгийн ачааллыг бууруулж, хөрсний бохирдлоос урьдчилан сэргийлэх чухал үүрэг гүйцэтгэх юм.
Тус төв хог ангилан ялгаж, дахин боловсруулалтад нийлүүлэхээс гадна иргэдийг хог хаягдлаа ангилж хэвших дадлыг төлөвшүүлэх зорилгоор урамшууллын хөтөлбөр хэрэгжүүлэхээр бэлтгэж байна. Үүнд, гар утасны аппликейшн ашиглан ангилсан хог хаягдлаа төвд тушаах бүртээ оноо цуглуулах, их хэмжээний хог тээвэрлүүлэх захиалга өгөх боломжтой ажээ.
