OpenAI компани бүтээгдэхүүнүүдийнхээ ашиглалтын талаарх бодлогод өөрчлөлт оруулсан байна. Шинэчилсэн журмын дагуу ChatGPT чатбот нь одооноос эхлэн хууль эрх зүй, эрүүл мэнд болон бусад мэргэжлийн чиглэлийн зөвлөгөөг өгөхгүй ажээ.

“Манай хэрэгслүүдийг аюулгүй, хариуцлагатай ашиглах, тэдгээрийн хэрэглээг бүрэн хянах нөхцлийг бүрдүүлэхийг бид зорьж байна” гэж компанийн мэдэгдэлд дурджээ. Тухайлбал, боловсрол, ажил эрхлэлт, орон сууц, санхүү, зээлийн үйлчилгээ, даатгал, мөн төрийн үйлчилгээ, цагаачлал болон үндэсний аюулгүй байдалтай холбоотой зөвлөгөөг өгөхгүй гэнэ. 

Шинэ журамд мөн хувийн мэдээллийг хамгаалах зохицуулалтыг тусгажээ. Тодруулбал, тухайн хүний зөвшөөрөлгүйгээр хөрөг зураг, дүрс, дуу хоолойг бүтээх үйлчилгээг ашиглахыг хориглосон байна. Мөн тухайн хувь хүний шинж чанарт үндэслэн гэмт хэрэг үйлдэх эрсдэлийг үнэлэх, урьдчилан таамаглахыг зөвшөөрөхгүй.

Үүнээс гадна, OpenAI компани өөрийн хэрэгслүүдийг заналхийлэл, сүрдүүлэг, дарамт, гүтгэлэгт ашиглахыг хатуу хориглосон болохыг сануулжээ. Мөн амиа хорлоход уруу татах, буруу хооллох, бэлгийн хүчирхийлэл, терроризмыг сурталчлах бүх хэлбэрийг хориглож, зэвсэг худалдан авах болон хэрэглэх талаарх зааварчилгааг хориглосон байна. 

Түүнчлэн хүүхэд, өсвөр насныхныг хамгаалах асуудалд онцгой анхаарал хандуулжээ. Одооноос эхлэн хүүхдийн гадаад төрхийн талаар сөрөг дүгнэлт өгөх, тэдэнд эрүүл бус хоололтыг сурталчлах, насны хязгаарлалттай контент, бараа бүтээгдэхүүнд хандах эрхийг хориглосон байна.

Үүнээс гадна, мөрийтэй тоглоомд зориулж OpenAI-гийн платформуудыг үүсгэх, мөн ашиглахыг хатуу хоригложээ.

Эх сурвалж: Kazinform