Нийслэлийн удирдах ажилтнуудын шуурхай зөвлөгөөн өнөөдөр боллоо.
Өвөлжилтийн бэлтгэл ажлын хүрээнд 750 төсөл, үйл ажиллагаа төлөвлөснөөс 2025 оны 10 дугаар сарын 31-ний байдлаар 95 хувийн гүйцэтгэлтэй байна. Ус, дулаан, цахилгаан, инженерийн хангамж, боловсрол, эрүүл мэндийн байгууллагын өвөлжилтийн бэлтгэл ажил 86-100 хувьтай байна. Мөн нийслэлийн хэмжээнд өнөөдрийн байдлаар 6889.8 тонн давс, 7127.6 тонн бодис, 1003.4 шоо метр дайргын үлдэгдэлтэй байна. Энэ үеэр нийслэлийн Засаг даргын нэгдүгээр орлогч Т.Даваадалай нийслэлийн нутгийн захиргааны байгууллагууд 2025 онд хийхээр төлөвлөсөн ажлаа эрчимжүүлэх, түлшний борлуулалтын цэгийн тоог нэмэгдүүлж, иргэдэд түлшийг хүртээмжтэй байдлаар олгох ажлуудыг шуурхай зохион байгуулах, авто тээврийн шалган бүртгэх товчоо, маршрутын бус замаар Улаанбаатар хот руу түүхий нүүрс нэвтрүүлэхгүй, сайжруулсан шахмал түлш гаргахгүй байхад хяналт тавих зэрэг үүрэг, даалгавар өглөө.
“Улаанбаатар хотын хөгжлийн корпорац” компаниас 50 байршилд төлбөртэй зогсоолын менежментийг сайжруулах төсөл хэрэгжүүлж буй. Үүний 13 байршилд хийх ажлын зураг төслийг боловсруулж байна. Хот байгуулалт, хотын стандартын газраас авто зогсоол байгуулах 40 байршлын жагсаалтыг гаргаж, загвар зураг боловсруулжээ. Эдгээр 40 байршлаас 30 байршилд нарийвчилсан ТЭЗҮ-ийг боловсруулахаар бэлтгэл хангаж байгаа аж.
Түүнчлэн нийслэлийн төвийн зургаан дүүргийн хэмжээнд 75.17 км урт дугуйн болон явган хүний замын барихаар төлөвлөж, 2026 онд эхний ээлжийн 12.9 км дугуйн зам, 555 метр явган хүний гүүрэн гарцыг барих зураг төслийг боловсруулж байна.
