Зарим улс оронд 10 дугаар сарын 31-нийг “Halloween” буюу сүнсний баяр хэмээдэг бол манай улсад тэмдэглэдэггүйгээс гадна бүх нийтийн баяр ёслол, тэмдэглэлт өдрийн жагсаалтад тусгаагүй.
Иймд байгууллагууд боловсролын орчинд олон нийтийн үйл ажиллагаа зохион байгуулахгүй байхыг ГБХНХЯ уриалж байна. Учир нь сүүлийн жилүүдэд энэ баярыг хүүхэд залуус өөрсдийн хүрээнд үйл ажиллагаа зохион байгуулж тэмдэглэх, багачуул нийлж айлын хаалга тогших болсон нь хүүхэд ямар нэг аюулд өртөх, бэртэж гэмтэх эрсдэлийг бий болгожээ.
Эцэг эх, асран хамгаалагчид хүүхдээ олон нийтийг хамарсан үйл ажиллагаанд оролцуулахгүй, зайлшгүй оролцох тохиолдолд учирч болох эрсдэлийг тооцож хараа хяналтаа сайжруулахыг зөвлөж байна. Тухайлбал, хүүхдээ ганцааранг нь явуулахгүй, хаашаа явахыг нь мэдэх, чихэр, амттан авахдаа болгоомжилж, сав баглаа нь гэмтсэн, баталгаагүй чихэр амттан идэхгүй, зам хөндлөн гарахдаа гарцаар явах, харааг хязгаарлах, алхахад саад болох хувцас өмсөхгүй байх, гэрэлтэгч наалт хэрэглэх нь харанхуйд тод харагдахад тусална.
Сүнсний баяр нь эртний келт үндэстний ургацын баяраас гаралтай, хэдэн мянган жилийн түүхтэй аж. Сүнснүүд намрын ургац хураалтын сүүлчийн өдөр манай ертөнц рүү шилжин, амьд болон сүнсний ертөнцийн хоорондох хөшиг хамгийн нимгэн гэж үздэг тул хулуу сийлбэрлэж асааж гэрэл чимэглэл болгохоос гадна хүүхдүүд айл бүрийн хаалга тогшин амттан гуйж, аймшиг, ид шид, домгийн дүрүүдийг бүтээж хувцасладаг аж.
