Сүүлийн жилүүдэд цахилгаан скүүтэр, мопед, цахилгаан дугуйны хэрэглээ эрчимтэй нэмэгдэж байгаа ч түүнтэй холбоотой осол, гэмтэл, зөрчил мөн дагаад огцом өсөж байна.
Хэрэв 2019 онд энэ төрлийн хэрэгслийн осол, зөрчлийн ердөө 14 тохиолдол бүртгэгдэж байсан бол 2025 оны долдугаар сарын байдлаар 6453 болсон байна. Осолд өртсөн иргэдийн дийлэнх нь хүүхдүүд бөгөөд 18-аас доош насны 2589 хүүхэд бэртэж, бусдыг гэмтээсэн 295 тохиолдол бүртгэгджээ. Энэ нь иргэдийн эрүүл, аюулгүй орчинд амьдрах үндсэн эрх хангалтгүй байгааг харуулж байна.
Мэргэжлийн байгууллагын мэдээллээр 2023 онд 274 осол бүртгэгдэж байсан бол 2024 онд 4844 болж нэмэгджээ. Осолд өртсөн хүмүүсийн 95 хувь нь хамгаалалтын малгай өмсөөгүй байсан нь анхаарал татаж байна.
Одоогийн Замын хөдөлгөөний аюулгүй байдлын тухай хуулиар 16 нас хүрсэн хүн мопед унах боломжтой гэж заасан байдаг. Гэвч 18 нас хүрээгүй иргэдийг “хүүхэд” гэж тодорхойлдог тул энэ насны хязгаар хүүхдийн эрхийг бүрэн хамгаалж чадахгүй байгааг мэргэжилтнүүд онцолж байна. Тиймээс хүүхдийн осол, гэмтлээс сэргийлэх үүднээс уг заалтыг нарийвчлан тодорхойлох, хязгаарлах шаардлагатай гэж үзэж байна.
2025 оны эхний есөн сарын байдлаар гэхэд л цахилгаан дугуй, скүүтэртэй холбоотой 380 гаруй осол бүртгэгдэж, дөрвөн иргэн амь насаа алдсан байна.
Одоогоор тээврийн хэрэгслийн техникийн ангилал, хөдөлгөөнд тавих шаардлагыг шинэчлэн баталж, цахилгаан хэрэгслийн хөдөлгөөнийг зохицуулж байгаа. Хүүхдүүдийн ихэвчлэн ашигладаг Jet, Eco Bike зэрэг хэрэгслүүд нь мопедын хүчин чадал, хурдыг гаргаж байгаа тул “мопед” ангилалд хамаарч байна. Үүний дагуу 16-аас дээш насны хүүхэд унадаг дугуйн замаар, эсвэл замын баруун гар талын эгнээгээр каск малгай өмсөж зорчих ёстой. Харин техникийн хувьд илүү хүчин чадалтай цахилгаан мотоцикл нь мотоциклийн ангилалд орж, 18 нас хүрсэн хүн жолоодох ёстой юм.
Мэргэжлийн байгууллагуудын мэдээлснээр өдөр бүр Jet Scoot, Kudry зэрэг цахилгаан скүүтэрийг 4500-5000 хүн, харин Eco Technology скүүтэрийг 11 мянга гаруй хүн ашиглаж байна.
Осол, зөрчлийн тоо ийнхүү хэт өсч байгаагийн улмаас Замын хөдөлгөөний аюулгүй байдлын тухай хуульд нэмэлт, өөрчлөлт оруулж, цахилгаан дугуйн ангиллыг тодорхойлох, нас болон хурдны хязгаар тогтоох шаардлага тулгарч байна.
