Манай улс 2017 оноос хойш өвлийн улиралд гэр хорооллын айл өрхүүдэд оройн 21:00 цагаас өглөөний 06:00 цаг хүртэл цахилгааны шөнийн тарифын хөнгөлөлт үзүүлж ирсэн. Энэ жилээс эхлэн уг хөнгөлөлтийн хугацааг өглөөний 09:00 цаг хүртэл уртасгасан байна.

Мөн хэрэглэгчийн холболтын хүчдэлийн түвшнээс хамаарч хөнгөлөх хэмжээнд өөрчлөлт оржээ. Тодруулбал,

• 220 вольтын сүлжээнд холбогдсон өрхүүдийн 1500 кВт.цаг хүртэлх хэрэглээг,

• 380 вольтын сүлжээнд холбогдсон өрхүүдийн 3000 кВт.цаг хүртэлх хэрэглээг
  100 хувь хөнгөлөх буюу бүрэн чөлөөлөх юм.

Харин дээрх хязгаараас давсан хэрэглээнд 50 хувийн хөнгөлөлт үзүүлэхээр болсон байна.

Шөнийн тарифын хөнгөлөлт энэ жил мөн 11 дүгээр сарын 1-нээс ирэх оны 4 дүгээр сарын 1-ний өдөр хүртэл үргэлжилнэ. Ийнхүү хэрэглэгчдэд хөнгөлөлтийн цагийг уртасгаж, хэрэглээний дээд хязгаарыг нэмэгдүүлснээр нийтдээ 240 мянга орчим айл өрх уг хөнгөлөлтөд хамрагдана гэж Эрчим хүчний яамнаас мэдээллээ.

Сүүлийн жилүүдэд манай улсын эрчим хүчний хэрэглээ тогтмол өсөж байгаа бөгөөд үүнд нийслэлийн амины орон сууцны 80 орчим хувь нь дулаан алдагдалтай байгаа нь нөлөөлж байна. Хэрэв айл өрхүүд байшингаа бүрэн дулаалж чадвал халаалтын цахилгаан хэрэглээгээ 30–40 хувиар бууруулах боломжтой гэж судалгаанд дурджээ.

Мэргэжилтнүүдийн хэлснээр, айлууд ханыг дулаалдаг ч шал, дээвэр, цонхыг бүрэн дулаалахгүй зэргээс болж дулаан ихээр алдагддаг байна. Иймээс байшинг иж бүрэн дулаалах нь цахилгааны хэрэглээг хэмнэх хамгийн үр дүнтэй арга гэлээ.

Эрчим хүчний салбарынхан энэ өвөл цахилгааны хэрэглээ 1800 МВт хүрэхэд ямар нэгэн таслалт, хязгаарлалтгүйгээр хэрэглээг хангах боломжтой гэж мэдээлсэн байна.