Аймгийн 19 сумын 101 багийн 8.1 мянган хот айл, 19.7 мянган малчин өрхийн 11.4 сая толгой малыг өвөл, хаврын улиралд бэлтгэх ажил бүрэн хангагдаад байна. Энэ жил нийт мал 3.7 сая га талбайд бэлчээрлэнэ.
Ус, цаг уур, орчны судалгаа, мэдээллийн хүрээлэнгээс гаргасан 2025–2026 оны өвөл, хаврын бэлчээрийн тооцоогоор нийт нутгийн 13.6 хувь нь бэлчээрийн нөөцтэй, 32.4 хувь нь хүрэлцээтэй, харин 53.9 хувь нь даац хэтэрсэн үзүүлэлттэй гарчээ. Үүнээс 5 хувь нь 3–5 дахин, 0.1 хувь нь олон дахин хэтэрсэн байна.
Бэлчээрийн хүрэлцээ өмнөх оныхоос 16 хувиар нэмэгдсэн ч зарим суманд өвөлжилтийн эрсдэл хэвээр байгаа тул өвс тэжээлийн нөөц бүрдүүлэх, отор нүүдэл хийх, малын тоог зохистой түвшинд барих шаардлагатайг мэргэжлийн байгууллагууд анхааруулжээ.
Мөн өвөл, хаврын улиралд зудын эрсдэлийг бууруулах зорилгоор бэлчээрийн нөөц бүхий сумдаас хадлан бэлтгэх, нэмэлт тэжээл нөөцлөх арга хэмжээг авч хэрэгжүүлэхийг сумдын удирдлагуудад үүрэг болгожээ.
Эх сурвалж: Ус, цаг уур, орчны судалгаа, мэдээллийн хүрээлэн.
