Монгол Улсын хэмжээнд цэцэрлэгийн насны 257 мянга, ерөнхий боловсролын сургуулийн 826.8 мянган сурагч суралцаж байгаа энэ үед багш нарын ажил хаялт үргэлжилж буйтай холбогдуулан хүүхдийн аюулгүй байдал, хамгааллыг сайжруулах шаардлага үүсээд байна.

Гэр бүл, хөдөлмөр, нийгмийн хамгааллын яамнаас холбогдох хуулийн заалтын дагуу бүх шатны төрийн болон хувийн байгууллагуудад чиглэл хүргэж, хүүхэд хамгааллын ажлыг эрчимжүүлэхийг үүрэг болголоо. Тухайлбал, эрсдэлт нөхцөлд байгаа хүүхдийн бүртгэл, судалгааг аймаг, дүүргийн Хүүхэд, гэр бүлийн хөгжил, хамгааллын байгууллагатай хуваалцаж, хяналт тавих, мэдээлэл солилцох ажлыг идэвхжүүлэхийг зөвлөсөн байна.

Мөн орон нутгийн Засаг дарга нарт эрсдэлтэй орчныг шалгах, олон нийтийн байцаагч, эргүүлийн цагдаа нартай хамтран ажиллах чиглэл өгчээ. Түүнчлэн төрийн болон хувийн хэвшлийн байгууллагууд 12 хүртэлх насны хүүхэдтэй эцэг эх, асран хамгаалагчдыг гэрээс цахимаар ажиллуулах, ажлын цагийг уян хатан зохицуулах, хүүхэд хамгааллын бодлогод нийцсэн шийдвэр гаргахыг уриалсан байна.

Сургуулийн сурагчдын эцэг эхчүүдэд хүүхдийн эрүүл мэнд, аюулгүй байдалд анхаарч, орчны эрсдэлийг үнэлж, урьдчилан сэргийлэх зөвлөмж, уриалга гарган ажиллахыг бүх байгууллагад чиглэл болгосон юм.

Эх сурвалж: Гэр бүл, хөдөлмөр, нийгмийн хамгааллын яам