Өвөрхангай аймгийг 2026-2030 онд хөгжүүлэх таван жилийн үндсэн чиглэлийн төслийг боловсруулах хүрээнд урьдчилсан хэлэлцүүлэг аймгийн төвд эхэллээ. Өнөөдөр хэлэлцүүлэгт төсөв, санхүүгийн салбарын ажилтнууд болон албан хаагчид оролцож, салбар тус бүрийн тулгамдсан асуудал, хөгжлийн зорилтыг хамтран тодорхойлж байна.
Хэлэлцүүлэг Хүний хөгжил, нийгмийн хамгаалал, хөдөө аж ахуй, үйлдвэр, худалдаа, байгаль орчин, аялал жуулчлал, дэд бүтэц, хууль, эрх зүй, засаглал, гадаад харилцаа зэрэг салбаруудын хүрээнд энэ сарын 30-ныг хүртэл үргэлжлэх юм.
Аймгийн Засаг даргын орлогч М.Батзоригийн хэлснээр, энэ удаагийн хэлэлцүүлэг нь өмнөхөөсөө ялгаатайгаар зөвхөн асуудал ярихаас илүү иргэд, байгууллагын оролцоонд тулгуурлан 2030 онд хүрэх зорилт, үр дүнг тодорхойлж буйгаараа онцлог аж.
Мөн ирэх долоо хоногт хувийн хэвшил, иргэний нийгмийн байгууллагуудыг хамруулах бөгөөд иргэд 70321111 дугаарын утсаар холбогдон саналаа өгөх боломжтой. Өвөрхангай аймгийн өмнөх буюу 2021-2026 оны хөгжлийн үндсэн чиглэл хэрэгжиж дуусах шатандаа орсон байна.
Эх сурвалж: Өвөрхангай аймгийн ЗДТГ
