Цагдаагийн ерөнхий газар (ЦЕГ)-аас иргэд банкны дансаа бусдад ашиглуулж, цахим залилангийн хэрэгт хамтран оролцох эрсдэл нэмэгдэж байгааг анхаарууллаа. Сүүлийн үед “Хусаад хож”, “Хаш чулуу”, “Азын хүрд” зэрэг урамшууллын тоглоом, телеграмм аппликейшнээр “Даалгавар биелүүлж мөнгөтэй болоорой” гэх мэт уриа ашиглан мөнгө залилах хэрэг ихэсч байгаа аж.

Мөн бараа бүтээгдэхүүн, өвс, мах, өвлийн хувцас зэргийг хямд үнээр зарна гэж итгүүлэн урьдчилгаа төлбөр нэхэж залилах тохиолдол олширч байна. Иймд Монголбанк, ЦЕГ, Монголын банкны холбоо хамтран иргэдийн санхүүгийн аюулгүй байдлыг хамгаалах зорилготой “Дансаа бүү ашиглуул” аяныг өнөөдрөөс эхлүүлжээ.

ЦЕГ-ын мэдээлснээр, он гарснаас хойш 18.8 тэрбум төгрөгийн хохирол бүхий нийт 2318 залилах гэмт хэргийн гомдол бүртгэгдсэн байна. Үүнээс 1591 гомдолд хөрөнгийн шилжилт хөдөлгөөнийг зогсоож, 11.4 тэрбум төгрөгийн гүйлгээг царцаан, 671 иргэн, хуулийн этгээдийн 1.33 тэрбум төгрөгийн хохирлыг нөхөн төлүүлжээ.

Монголбанкны Олон нийтийн санхүүгийн боловсролын төвийн захирал Б.Одонтунгалаг “Нийт иргэдийн таван хүн тутмын дөрөв нь залилах гэмт хэрэгт өртөж байна. Энэ бол маш ноцтой асуудал” хэмээн анхааруулсан байна.

Эх сурвалж: Цагдаагийн ерөнхий газар, Монголбанк