Ерөнхий боловсролын сургуулиуд болон сургуулийн өмнөх боловсролын байгууллагын 20 гаруй мянган багш нар цалингаа нэмүүлэхээр шаардаж, хугацаагүй ажил хаялт зарласнаас /2025.10.16/ хойш арав гаруй хоног өнгөрөөд байна.

МҮЭ-ийн холбооны зүгээс "Бид тэмцлээ үргэлжлүүлнэ. Яамнаас ирүүлсэн хэлэлцээний эхний төсөл дээр бид өөрсдийнхөө хүссэн хэмжээнд цалин нэмэх томъёоллоо хүргүүлсэн. Ирэх 2026 оны нэгдүгээр сарын 1-нээс 3.3 сая төгрөг, үлдсэн нэмэгдлийг долдугаар сарын 1-нээс шийдвэрлэвэл ажил хаялтаа зогсоож, хэлэлцээ эхлүүлэхэд бэлэн" гэсэн. Харин Засгийн газар, салбарын яамны зүгээс "Цалинг шууд 3.5 сая төгрөгт хүргэх боломжгүй, шат дараатай нэмнэ, 2028 он гэхэд 3,5 сая төгрөгт хүргэнэ" гэдэг байр суурийг илэрхийлээд байгаа. Тиймээс Боловсролын яамны зүгээс, Монголын боловсрол, шинжлэх ухааны үйлдвэрчний эвлэлийн холбооны удирдлагад хандаж ажил хаялтыг түр зогсоох, хамтын хэлэлцээг эхлүүлэхийг уриалжээ.

Ирэх оны төсөвт, нийт төрийн албан хаагчдын цалинд 8.3 их наяд төгрөг төсөвлөсөн. Үүнээс боловсролын салбарын ажилчдын цалинд 2.8 их наяд төгрөг буюу дээрх зардлын 33.8 хувийг боловсролын салбарын албан хаагчдын цалин эзэлж байна. Хэрэв боловсролын салбарын цалинг нэмэгдүүлэхээр болбол, энэ нь ганц багшийн цалингаар зогсохгүй сургуулийн нийгмийн ажилтан, сэтгэл зүйч гэх мэт  тухайн салбарт ажилладаг бүх ажилчдын цалинг нэмэх шаардлага үүснэ. Цалинг 3.5 сая төгрөг болгож нэмэгдүүлбэл одоогийн 2.8 их наяд төгрөгийн төсөв дээр нэмээд 3.3 их наяд төгрөг, нийт 6.1 их наяд төгрөг шаардлагатай гэдгийг Боловсролын яамнаас мэдээлжээ. Энэ нь   нийт төрийн албан хаагчдын цалингийн төсвийн 73.1 хувийг эзлэхээр байна.

Засгийн газар багш нарын цалинг 2026 оны эхний хагаст 2 сая төгрөг, 2026 оны сүүлийн хагаст 2.5 сая төгрөг болгон энэ мэт шат дараатай нэмж 2028 он гэхэд 3.5 сая төгрөгт хүргэх тооцооллыг гаргажээ.