Тэнгис-Шишгэдийн Байгалийн цогцолборт газрын хамгаалалтын захиргаанаас өнгөрсөн зургадугаар сард хийсэн төлөвлөгөөт бус хяналт шалгалтаар улсын тусгай хамгаалалттай газар нутагт хууль бусаар ногоон хаш олборлосон зөрчлийг илрүүлсэн байна. Шалгалт зургаадугаар сарын 6, 7-нд зохион байгуулагдаж, хоёр ЗИЛ-131 автомашинд нэг тонн орчим хаш ачсан долоон иргэнийг илрүүлж, хэрэг бүртгэлийг прокурорын байгууллагад шилжүүлжээ.
Мөн долдугаар сарын 18-нд иргэнээс ирсэн мэдээллийн дагуу дахин шалгалт хийхэд УАЗ фургон автомашинд 500 кг орчим ногоон хаш ачсан дөрвөн иргэнийг баривчилсан байна. Тэдний нэг нь тухайн орон нутгийн удирдах албан тушаалтантай холбоотой болохыг Байгаль орчин, уур амьсгалын өөрчлөлтийн яам мэдээлэв.
Хяналт шалгалтын үр дүнд илэрсэн зөрчлүүдийг Экологийн цагдаагийн алба болон прокурорын байгууллага харьяаллын дагуу шалгаж байгаа бөгөөд байгалийн нөөцийг хууль бусаар ашигласан иргэдэд хариуцлага тооцох арга хэмжээ авахыг холбогдох байгууллагууд онцолжээ.
Эх сурвалж: Байгаль орчин, уур амьсгалын өөрчлөлтийн яам.
