Нийслэлийн Засаг даргын нийгмийн салбар, ногоон хөгжил, агаар, орчны бохирдлын асуудал хариуцсан орлогч А.Амартүвшин шахмал түлш тээвэрлэгч компаниудтай уулзалт хийж, гүйцэтгэлийн байдлыг хэлэлцлээ.

Уулзалтаар 26 компанийн ажлын явцыг дүгнэхэд 10 нь шаардлага хангаагүй гэж үзсэн бөгөөд наймд нь сүүлийн удаа сануулга өгч, хоёр компанийн гэрээг цуцлан хар жагсаалтад оруулсан байна. “Ю Би Холболт” ХХК есдүгээр сарын 15-наас хойш 770 тонн түлш тээвэрлэх ёстой байсан ч 140 тонн л гүйцэтгэсэн бол “Баянбүрд инвест” ХХК 24 хувийн биелэлттэй ажилласан аж.

Харин “Ихэр Алмаз” ХХК зэрэг зургаан компани төлөвлөгөөгөө давуулан биелүүлж, түлшний хомсдолыг бууруулахад хувь нэмэр оруулжээ. Орлогч дарга А.Амартүвшин “176 мянган өрхийн өмнө бид хариуцлага хүлээж байгаа. Тиймээс үлдсэн компаниуд гурван хоногийн дотор тээвэрлэлтийн ажлаа жигдрүүлэх ёстой” хэмээн онцолсон юм.

Мөн түлш тээврийн автомашинуудыг нэгдүгээр эгнээгээр зорчих эрхийг нээж, автомашины мэдээллийг Нэгдсэн удирдлагын төвд бүртгүүлэхийг холбогдох байгууллагуудад үүрэг болголоо.

Эх сурвалж: НЗДТГ-ын хэвлэл мэдээлэл, олон нийттэй харилцах хэлтэс