НИТХ-ын ээлжит V хуралдаанаар 800 айлын орон сууцны метр квадратын үнийг баталжээ.

Улаанбаатар хот болон төвлөрлийг сааруулах, түгжрэлийг бууруулах “20 минутын хот” бодлогын хүрээнд 2020 оноос  Баянхошуу, Шархад байршилд  “Ногоон орон сууц” хөтөлбөрийг хэрэгжүүлж байна. Азийн хөгжлийн банк, Уур амьсгалын ногоон сан болон Өндөр технологийн сангийн эх үүсвэрээс санхүүжүүлж буй энэхүү төслийг гурван үе шаттай хэрэгжүүлнэ.

Эхний ээлжид Баянхошуу, Шархад дэд төвд нам давхрын 800 өрхийн орон сууц бүхий “Эко хотхон” хорооллыг барьж ашиглалтад оруулж байна. Баянхошуу дэд төвийн орон сууцны метр квадратын үнэ 2.7 сая, Шархад дэд төвийнх 3.04 сая төгрөг байхаар тогтжээ. “Ногоон орон сууц” төслийн үнийг тогтоохдоо тухайн бүс орчмын үнэ ханштай уялдуулсан бөгөөд эхний ээлжийн 800 орон сууцны 25 хувийг түрээслээд өмчлөх, 75 хувийг худалдаа үйлчилгээний талбай, агуулах, дулаан зогсоолын хамт төсөлд хамрагдах иргэдийн газраар солих болон худалдан борлуулах ажээ.

Харин хоёрдугаар ээлжид “Эко хороолол ба орлогод нийцсэн орон сууцны сан”-г байгуулж 4200 өрхийн ногоон орон сууцыг дэд төвүүдэд барих зорилготой. Гуравдугаарт, ногоон барилга, эко хорооллын норм, стандартыг тодорхойлох, салбарын чадавхыг бэхжүүлэх зэрэг зорилготой” гэдгийг хуралдааны үеэр онцоллоо. Эхний ээлжийн 800 орон сууцыг энэ ондоо багтаан ашиглалтад бүрэн оруулахаар ажиллаж байгаа бөгөөд хууль журмын дагуу холбогдох ашиглалтын эрхийг НОСК-д даалгах санал гаргажээ.