ГБХНХЯ-наас байгууллага, аж ахуйн нэгжүүд ажилтныхаа ажил, амралтын цагийг оновчтой зохицуулж, хөдөлмөр эрхлэлтийн уян хатан нөхцөл бүрдүүлэх, хүүхэд хамгааллын зарчимд нийцсэн ээлтэй шийдвэр гаргахыг уриалав.

Учир нь боловсрол, эрүүл мэндийн салбарын ажилтнууд өнөөдрөөс хугацаагүй ажил хаяж, мөн сурагчдын бие даалтын долоо хоног энэ сарын 20-24-нд эхэлж байгаатай холбогдуулан бага насны хүүхдүүдийн аюулгүй байдлыг хангах, хамгааллыг сайжруулах шаардлага үүсээд байгаа юм. Одоогоор Монгол Улсад цэцэрлэгийн насны 257 мянга орчим, ерөнхий боловсролын сургуульд 826.8 мянган хүүхэд суралцаж байна.

Хөдөлмөрийн тухай хуулийн 43 дугаар зүйлийн 43.3 дахь хэсэгт: “Ажил олгогч нь ажил, амралтын цагийг зохицуулах, хөдөлмөр эрхлэлтийн уян хатан нөхцөл хэрэглэх зэргээр ажилтны ажил, амьдралын тэнцвэрийг хангахыг дэмжих, хамтын гэрээ, хөдөлмөрийн дотоод хэм хэмжээнд тусгах замаар ажилтны хүүхдэд ээлтэй, хүүхэд хамгааллын бодлого хэрэгжүүлнэ” гэж заасан байдаг аж.

Түүнчлэн, эцэг эх, асран хамгаалагч нар хүүхдээ хараа хяналтгүй орхихгүй, гэр орныхоо аюулгүй байдлыг шалгах, бэртэж, гэмтэж болзошгүй эд зүйлсийг хол байлгах, цахим хэрэглээг нь хянах, шим тэжээлтэй хоол хүнсээр хангах, тэдний орчинд архидан согтуурахгүй, хүчирхийлэл, гэмт халдлагаас урьдчилан сэргийлэх, хүүхдийг малд явуулахгүй, салхи, цас шуургатай үед харгалзах хүнгүй гэрт үлдээхгүй байхыг зөвлөж байна.