Боловсролын яамны Төрийн нарийн бичгийн дарга Х.Батжаргал, Холбооны Бүгд Найрамдах Герман Улсын Саксони Муж улсын Шинжлэх ухаан, соёл, аялал жуулчлалын Төрийн нарийн бичгийн дарга Хайке Грассманн нар "Саксони дахь Монголын өдрүүд" арга хэмжээний Боловсролын салбар хуралдааныг нээлээ.

Энэхүү салбар хуралдаанд Монгол Улсын төрийн өмчит их сургууль, Саксони муж улсын их, дээд сургуулиуйн удирдлагууд оролцож, сургууль хоорондын шууд хамтын ажиллагааг өргөжүүлэх хүрээнд хамтарсан судалгааны төсөл, 2+2 хөтөлбөр хэрэгжүүлэх, багш, судлаач болон оюутан солилцоог нэмэгдүүлэх, Саксони муж улсын тэтгэлгээр оюутан суралцуулах зэрэг чиглэлээр нээлттэй хэлэлцэв.

Мөн хуралдааны үеэр Монгол Улсын төрийн өмчит их сургуулийн удирдлагууд Саксони муж улсын их сургуулиудтай хамтын ажиллагааг хөгжүүлэх хүрээнд хоёр талын албан уулзалт хийсэн бөгөөд МУИС болон Зенкэнбергийн Байгалийн түүхийн музей хооронд, МГТИС болон Дрездений Технологи, эдийн засгийн их сургууль хооронд хамтын ажиллагааны санамж бичгийг байгууллаа. Энэ нь цаашдын хамтын ажиллагааны эрчтэй хөгжлийн эхлэл болохыг Саксони муж улсын талаас онцолсон юм.

Монгол Улс болон ХБНГУ-ын Саксони муж улс хоорондын боловсрол, шинжлэх ухааны хамтын ажиллагаа нэн уртын түүхтэй бөгөөд хамтран хэрэгжүүлсэн олон судалгаа, төсөл, хөтөлбөр өнөөг хүртэл үр өгөөжөө өгч байна. Салбар хуралдааны үеэр хамтын ажиллагааны зарим томоохон ажлыг хэлэлцсэн бөгөөд үүнээс дурдвал ШУТИС-ийн дэргэд Саксони муж улсын Шинжлэх ухаан, боловсролын төлөөлөгчийн газар байгуулагдсан, "Илгээлт 2100" тэтгэлэгт хөтөлбөрийн 108 суралцагч суралцах боломж бүрдсэн, уул уурхай, геологи, архелоги, байгалийн ухаан зэрэг олон салбарт хамтарсан судалгааны ажил гүйцэтгэсэн зэрэг үйл явдал юм гэж Боловсролын яамнаас мэдээллээ.