Шведийн Засгийн газар IKEA-гийн гүйцэтгэх захирлын ажлаа хүлээлгэн өгч буй Йеспер Бродиныг НҮБ-ын Дүрвэгсдийн асуудал эрхэлсэн дээд комиссарын албан тушаалд нэр дэвшүүлжээ.

“Бизнесийн салбарын манлайлагчдыг нэр дэвшүүлэх нь тун ховор тохиолдол учраас засгийн газар намайг дэвшүүлсэнд би их гайхсан. Уур амьсгалын асуудал ч бай, дүрвэгсдийн асуудал ч бай ялгаагүй бид нийгэм дэх саад бэрхшээлүүдийг арилгах хэрэгтэй” гэж Бродин Их Британийн “Financial Times” сонинд өгсөн ярилцлагадаа хэлсэн байна. 

Тэрбээр хэлэхдээ, НҮБ-ын хувьд өөрчлөлтийн үе шатандаа явж байгаа тул олон улсад үйл ажиллагаа явуулдаг томоохон байгууллагуудад ажиллаж байсан туршлагатай удирдагчид хэрэгтэй” гэдгийг нэмж дурджээ. Йеспер Бродин нь “43 улсад 170 мянган ажилтантай компанийг удирдаж байсан туршлагатай” учир Шведийн засгийн газар ийм шийдвэр гаргасан аж. 

Нэр дэвшигчдээс комиссарыг НҮБ-ын Ерөнхий нарийн бичгийн дарга Антонио Гутерриш сонгох бөгөөд түүний санал болгосон нэр дэвшигчийг дараа нь Ерөнхий Ассамблейн санал хураалтаар батлах ёстой. Дүрвэгсдийн асуудал эрхэлсэн 11 дэх буюу одоогийн дээд комиссар Филиппо Гранди 2016 оны нэгдүгээр сарын 1-нд үүрэгт ажилдаа орж байжээ. 

Эх сурвалж: TASS