Өнөөдөр өглөө 11.00 цагт зарлагдсан ТББХ-ны хуралдаан "ирц хүрээгүй" шалтгаанаар хойшилсон. Энэ талаар УИХ-ын гишүүн, Сангийн сайд Б.Жавхлан өнөөдөр сэтгүүлчдийн асуултад хариулж, дараах мэдээллийг өглөө.

-Төрийн байгуулалтын байнгын хорооны хуралдаан өнөөдөр үргэлжилж, Засгийн газрын тэргүүнийг огцруулах асуудал хэлэлцэх байсан ч тодорхойгүй хугацаагаар хойшиллоо. Гэтэл ирэх оны төсвийн хэлэлцүүлэг хүлээгдэж байгаа. Сангийн сайдын хувьд та энэ талаар юу хэлэх вэ?

-Төрийн байгуулалтын байнгын хороо Ерөнхий сайдыг огцруулах асуудлаар дүгнэлт гаргах ёстой. Байнгын хороо өнгөрөгч баасан гаригийн /2025.10.10/ хуралдааныг үргэлжлүүлж, шөнөжин хуралдах боломж байсан. Өмнө нь олон удаа шөнөжин хуралддаг байсан. Гэвч өнгөрөгч баасан гаригийн хуралдааныг "ажлын цаг дууссан" гээд завсарлуулсан. Өнөөдөр ээлжит бус чуулганыг зарлаж асуудлуудыг нэг тийш болгоод төсвөө хэлэлцсэн бол улс оронд хэрэгтэй байлаа.

Ялангуяа өнөөдрийнх шиг ирцтэй холбоотой асуудлаар байнгын хорооны хурлыг тодорхойгүй шалтгаанаар хойшлуулах нь УИХ-ын дэгийн тухай хууль, Үндсэн хуулийг зөрчсөн асуудал болж байна. Хуралдааны товыг зарласангүй, хурал болохгүй гэдгийг л зарласан. Төрийн байгуулалтын байнгын хорооны өнөөдрийн хуралдаан баасан гаригийн хуралдаан ирцээр явагдах ёстой. Үг хэлэх гэж нэрээ өгсөн УИХ-ын гишүүдийн эрх бол үг хэлэх болохоос хариулт нэхэх биш. Энэ бол олон нийтэд ил тод явагддаг процесс. Тийм болохоор хуралдааныг үргэлжлүүлэх боломжтой байсан. Мөн ирцэд орсон гишүүд байхгүй учраас санал хураах боломжгүй гэдэг шалтгаан байж болохгүй. Байхгүй байгаа гишүүд эсрэг санал гаргаснаар тооцогдоод явдаг. Үүнийг иргэд бүгд мэддэг. Гэтэл зориудаар хойшлуулж байгаа нь сэжигтэй үйлдэл боллоо. Хурал даргалагч нар хэт нэг талыг барих нь муухай харагдана. Алх барьсан хүнд хүн болгон хадаас шиг харагддаг юм шиг байна.

УИХ төсвөө баталж чадахгүй байна гэдэг сандал ширээний асуудлаас өөр. Улс орны асуудал. Төсвийн бодлогоос хамаарч хувийн хэвшил, хөрөнгө оруулагчид ажлаа төлөвлөнө. Гэтэл төсөв байхгүй бол хөдөлмөрийн доод хэмжээгээр төрийн алба хаагчдын цалинг тооцоолж олгоно. Хөрөнгө оруулалт болон бусад томоохон төсөл арга хэмжээнүүд бүгд зогсоно, завсарлана гэсэн үг. Энэ тохиолдолд УИХ тарах ч багадна. Улс орны эдийн засгийн аюулгүй байдалд ноцтой эрсдэл үүснэ. Одоогоор АНУ-д ийм нөхцөл байдал үүссэн байгаа.

АН-д хандаж хэлэхэд, төсөв буцаагаад хэрэггүй, асуудал сайжрахгүй. Асуудал сайжрах гарц байвал УИХ-ын хэлэлцүүлэг дээр ярьж хэлээд, засаад явах бүрэн боломжтой.