Төрийн өмчит "Эрдэнэс-Оюутолгой" компани /Л.Оюун-Эрдэнийн/ Засгийн газрын шийдвэрээр гадаад улсын "Atticus Partners Ltd" болон "Atticus communications Ltd" компанитай гэрээ хийж, 4 удаагийн үйлдлээр нийт 1.9 сая ам долларыг (7 тэрбум орчим төгрөг) “Дэлхийд Монголыг сурталчлах” нэрээр "Херо энтертэйнмент" компаний бүтээл “Монгол хаан” жүжгийн гадаад сурталчилгааг хийсэн тухай УИХ-ын гишүүн Б.Энхбаяр баримт дэлгэсэн. Сануулахад, "Херо интертэйнмент" компанийн 50 хувийг Ерөнхий сайд асан Л.Оюун-Эрдэнэ эзэмшдэг тухай АТГ-т гаргаж өгсөн ХОМ-тээ мэдүүлжээ. 

Дээрх мэдээлэл цацагдсаны дараа /2025 оны 10 дугаар сарын 11/ Их Британи, Умард Ирландын Нэгдсэн Хаант Улсын Лондон хотод бүртгэлтэй, бие даасан зөвлөх болон харилцаа холбооны үйлчилгээ үзүүлдэг гэх “Atticus Partners” компанийн мэдэгдэл гаргаж, дээрх мөнгө нь "Монгол хаан" жүжиг болон "Херо интертэйнмент компанитай холбоогүй, Монгол Улсын Гадаад харилцааны яамтай хамтран ажилласан гэжээ.

Тэгвэл тус компанийн хийсэн мэдэгдлийн хариуд Монгол Улсын Гадаад харилцааны яамнаас өнөөдөр дараах мэдэгдлийг гаргасан байна. 

Мэдэгдэл

Их Британи, Умард Ирландын Нэгдсэн Хаант Улсын Лондон хотод бүртгэлтэй, бие даасан зөвлөх болон харилцаа холбооны үйлчилгээ үзүүлдэг “Atticus Partners” гэх компанийн зүгээс 2025 оны 10 дугаар сарын 11-ний өдөр гаргасан мэдэгдэлдээ Монгол Улсын Гадаад харилцааны яамтай хамтран ажиллаж байсан хэмээн дурджээ.

Гадаад харилцааны яамны зүгээс "Atticus Partners” гэх байгууллагатай ямар нэг хэлбэрээр хамтран ажиллаж байгаагүй болохыг албан ёсоор мэдэгдэж байна.

Монгол Улсын Үндсэн хууль, Үндэсний аюулгүй байдлын үзэлт баримтлалд заасны дагуу гадаад харилцааны асуудал эрхэлсэн төрийн захиргааны төв байгууллага болох Гадаад харилцааны яам нь Монгол Улсын аюулгүй байдал, үндэсний язгуур ашиг сонирхлыг олон улсын эрх зүйн хүрээнд улс төр-дипломатын аргаар хангах, гадаад бодлогын нэгдмэл байдлыг хангаж, залгамж чанарыг хадгалах, төрийн захиргааны төв болон засаг захиргаа, нутаг дэвсгэрийн нэгжийн гадаад харилцааг уялдуулан зохицуулах, хяналт тавих үүргийг гүйцэтгэдэг.

Төрийн болон албаны нууцын тухай хууль, Засгийн газрын 2017 оны 247 дугаар тогтоолын дагуу төрийн дээд, өндөр хэмжээний харилцан айлчлал, хоёр болон олон талын яриа, хэлэлцээний тухай мэдээлэл нь төрийн нууцад хамааруулах

мэдээлэл болно /Төрийн болон албаны нууцын тухай хуулийн 13.1.1.д/.

Гадаад харилцааны яам төрийн дээд, өндөр түвшний гадаад айлчлал, арга хэмжээ болон түүнийг хэрэгжүүлэхтэй холбоотой мэдээллийг төрийн нууцтай танилцах эрхгүй нэгж, албан тушаалтан, гадаад улсын хуулийн этгээдтэй хуваалцах, аливаа ажил гүйцэтгүүлэх боломжгүй бөгөөд энэ нь хуулиар хориотой юм.

Монгол Улсын Гадаад Хэргийн яам