“Тавантолгой–Гашуунсухайт” чиглэлийн төмөр замын төслийн гэрээнүүдийг олон нийтэд нээлттэй болгож, холбогдох бүх мэдээллийг ил тод байлгахаар болсон талаар “Эрдэнэс Тавантолгой” ХК-аас мэдээллээ.

Тус төмөр замын төслийг анх 2012 онд эхлүүлсэн бөгөөд далангийн ажлыг хийсний дараа хоёр жилийн хугацаанд зогссон байдаг. Харин 2019 оноос “Бодь Интернэйшнл” компани гүйцэтгэгчээр, “Эрдэнэс Тавантолгой” ХК санхүүжүүлэгчээр, “Тавантолгой төмөр зам” компани захиалагчаар ажиллаж эхэлсэн юм.

Энэ хүрээнд байгуулсан оптик гэрээг нууцын зэрэглэлд хамааруулсан байсан ч, одоо тус гэрээнүүдийг нээлттэй болгож, иргэд, судлаачид үзэх боломжийг бүрдүүлжээ. Мөн төслийн хэрэгжилттэй холбоотойгоор Монголын төрийн байгууллагууд болон Хятадын талын холбогдох яам, албан тушаалтнуудын хооронд солилцсон албан бичиг, мэдээллийг ил болгох шийдвэр гаргасан байна.

Ил тод байдлыг хангах энэхүү шийдвэрийг хэрэгжүүлэх хүрээнд Зам, тээврийн хөгжлийн яам, Сангийн яам, Аж үйлдвэр, эрдэс баялгийн яамдад хадгалагдаж буй холбогдох баримтуудыг нийтэд нээлттэй болгох үүрэг өгчээ.

Нууцаас гаргасан гэрээнүүдээс нүүрсний үнийг тонн тутамд 60 ам.доллараар тооцох заалт хамгийн их анхаарал татаж байна. Судлаачдын үзэж буйгаар энэхүү үнэлгээ нь тухайн үеийн зах зээлийн ханшнаас доогуур байсан бөгөөд 1 тэрбум ам.долларын хөрөнгө оруулалтыг нүүрсээр төлөх нөхцөл эдийн засгийн хувьд ашиггүй байжээ.

Төслийн тууш хэсгийг 2022 онд ашиглалтад оруулсан ч өнөөг хүртэл Хятадын төмөр замын сүлжээтэй холбох ажил бүрэн хийгдээгүй байна. Үүнийг гүйцэтгэхэд шаардлагатай хөрөнгийг дахин “Эрдэнэс Тавантолгой” компани гаргахаар болсон талаар мэдээлэв.

Иргэд болон сонирхогч талууд ЭТТ компанийн “ettd.mn” цахим хуудсаар орж, нууцаас гаргасан гэрээнүүдтэй нэг бүрчлэн танилцах боломжтой болжээ.