2025 оны эхний есөн сарын байдлаар Монгол Улсын гадаад худалдааны нийт бараа эргэлт 19.2 тэрбум ам.доллар болж, өмнөх оны мөн үеэс 1.15 тэрбум ам.доллараар (5.6%) буурсан байна. Экспортын хэмжээ импортын дүнгээс 2.17 тэрбум ам.доллараар давж, гадаад худалдааны баланс эерэг гарчээ.

Гаалийн байгууллагын 543,200 экспорт, 291,096 импортын мэдүүлэг болон бусад эх сурвалжийн мэдээлэлд тулгуурлан гаргасан уг дүнгээр, экспортын бараа, түүхий эдийн нийт хэмжээ 10.7 тэрбум ам.доллар, импорт 8.53 тэрбум ам.доллар байна.

Экспорт өмнөх оны мөн үеэс 9.1 хувиар буурсан бөгөөд нийт экспортын 99.2 хувийг валютын төлбөртэй худалдаа эзэлжээ. Экспортын бүтэц дотор эрдэс бүтээгдэхүүн 86.8 хувь (9.29 тэрбум ам.доллар), үнэт металл ба үнэт чулуу 6.6 хувь (708.8 сая ам.доллар), нэхмэл эдлэл, ноолуур зэрэг бүтээгдэхүүн 2.2 хувь (231 сая ам.доллар)-ийг тус тус эзэлж байна.

Монгол Улсын экспортын гол чиглэл хэвээр байгаа бөгөөд хар тугалганы хүдэр, төмрийн хүдэр, цайрын баяжмал, түүхий нефть, чулуун нүүрсийг 100 хувь, зэсийн баяжмал, хүрэн нүүрсний 99.9 хувийг БНХАУ-д экспортолсон байна. Мөн самнасан ноолуурын 81.4 хувь нь БНХАУ руу гарсан бөгөөд эдгээр нэр төрлийн бараа экспортын нийт дүнгийн 83.3 хувийг бүрдүүлжээ.

Нийт 80 оронд бараа экспортолж байгаа бөгөөд үүнээс БНХАУ-д 91.2 хувь, Швейцарьт 5.7 хувь, АНУ-д 0.9 хувь, ОХУ-д 0.4 хувь ногдож, нийт экспортын 98.2 хувийг дээрх дөрвөн улс эзэлж байна.

Импортын дүн 8.53 тэрбум ам.доллар болж, өмнөх оны мөн үеэс 74.4 сая ам.доллараар (0.9%) буурсан байна. Импортын 96.5 хувийг валютын төлбөртэй худалдаа эзэлж байгаа бол үлдсэн хэсгийг гадаадын зээл, тусламж, хөрөнгө оруулалтаар нийлүүлсэн бараа эзэлжээ.

Импортын бүтцэд машин, тоног төхөөрөмж ба цахилгаан хэрэгсэл 21.5 хувь (1.84 тэрбум ам.доллар), эрдэс бүтээгдэхүүн 20.8 хувь (1.78 тэрбум ам.доллар), тээврийн хэрэгсэл, сэлбэг 19.5 хувь (1.66 тэрбум ам.доллар), хүнсний бүтээгдэхүүн 10.4 хувь (888.1 сая ам.доллар), төмөрлөгийн бүтээгдэхүүн 9.4 хувь (803.8 сая ам.доллар), химийн бүтээгдэхүүн 5.8 хувь (496.3 сая ам.доллар) тус тус эзэлж, эдгээр нь нийт импортын 87.5 хувийг бүрдүүлсэн байна.

Мөн олон улсын байгууллага, хандивлагч орнуудын тусламжаар 28.1 сая ам.долларын бараа, зээлээр 85.1 сая ам.долларын бараа импортолжээ. Тусламжийн гарал үүсэлд АНУ 60.6 хувь, БНСУ 14.5 хувь, БНХАУ 8.9 хувь ногдож байгаа бол зээлийн гарал үүсэлд БНХАУ 56.5 хувь, Франц 17.8 хувь, Энэтхэг 11.4 хувь, Австри 6.6 хувь тус тус эзэлж байна.

Гадаадын хөрөнгө оруулалтаар 88.8 сая ам.долларын бараа нийлүүлэгдсэн бөгөөд үүний 78.1 хувь нь ОХУ-аас, 18.5 хувь нь БНХАУ-аас орж иржээ. Монгол Улс нийтдээ 154 орноос гаралтай бараа импортолж байгаа бөгөөд үүнээс БНХАУ 40.4 хувь, ОХУ 23.9 хувь, Япон 10.8 хувь, БНСУ 4.2 хувь, АНУ 3.9 хувь ногдож, нийт импортын 83.2 хувийг эдгээр таван улс бүрдүүлж байна.