Цагдаагийн ерөнхий газрын Урьдчилан сэргийлэх албанаас хүүхдийн эрх, аюулгүй байдлыг хамгаалах хүрээнд сургуулийн орчин дахь үе тэнгийн дээрэлхэлт, бүлгийн хүчирхийллээс урьдчилан сэргийлэх ажлыг улсын хэмжээнд эрчимжүүлэн зохион байгуулж байна.

ЦЕГ-ын Хүүхдийн гэмт хэрэгтэй тэмцэх хэлтсийн дарга, цагдаагийн хурандаа Б.Будзан энэ талаар мэдээлэл өгөхдөө:

“Сургуулийн орчинд хүүхдүүдийн хооронд үүсдэг үе тэнгийн дээрэлхэл, бүлгийн хүчирхийллээс урьдчилан сэргийлэх зорилгоор хяналт шалгалт, сургалт, нөлөөллийн ажлыг шат дараатай зохион байгуулж байна. Улсын хэмжээнд үйл ажиллагаа явуулж буй 870 орчим сургуульд нэргүй санал асуулга авч, сурагчидтай уулзан мэдээлэл цуглуулж, дээрэлхэл үйлдэж болзошгүй хүүхдүүдтэй ажиллаж байгаа” гэж онцоллоо.

Тэрбээр мөн “Жил бүр дунджаар 500 орчим зөрчлийн хэрэг, 100 орчим эрүүгийн хэрэг үе тэнгийн дээрэлхэлтэй холбоотой бүртгэгддэг. Сүүлийн жилүүдэд дээрэлхэл цахим орчинд илүүтэй гарч, бусдыг доромжлох, дарамтлах хэлбэрээр үйлдэгдэх хандлагатай байна” гэдгийг хэллээ.

Ийнхүү цахим болон бодит орчинд үйлдэгдэж буй дээрэлхэл нь зөвхөн хохирогч хүүхдийн сэтгэл зүйд төдийгүй сурлага, хүмүүжилд сөргөөр нөлөөлдөг байна. “Дээрэлхэлд өртсөн хүүхэд сургуулиасаа дайжих, сурах сонирхол буурах, анги хамт олныхоо дунд дарамтад өртөх зэрэг сөрөг үр дагавартай байдаг. Иймд багш, нийгмийн ажилтан, эцэг эх хамтран хүүхдийн асуудлыг шийдвэрлэх, шаардлагатай бол цагдаагийн байгууллагад хандах нь зүйтэй” гэж Б.Будзан онцоллоо.

Мөн тэрбээр эцэг эхчүүдэд дараах анхааруулгыг өгсөн юм. 

“Хүүхдээ өмөөрч, бусдын хүүхдийг зодох, дарамтлах зэрэг хувийн арга хэмжээ авах нь өөрөө зөрчил, гэмт хэрэгт тооцогддог. Ийм үйлдэл гаргасан тохиолдолд эцэг эхчүүд хуулийн хариуцлага хүлээдэг гэдгийг ойлгох хэрэгтэй” гэлээ.

Цагдаагийн байгууллагаас хүүхдийн эрхийг хамгаалах, дээрэлхэл хүчирхийллээс урьдчилан сэргийлэх чиглэлд багш сурган хүмүүжүүлэгч, сэтгэл зүйч, нийгмийн ажилтантай хамтран ажиллаж, сургалт, уулзалтыг тогтмол зохион байгуулж байгаа юм.

Эх сурвалж: Цагдаагийн ерөнхий газрын Урьдчилан сэргийлэх алба