УИХ-ын дарга Д.Амарбаясгалангийн нэр холбогдоод байгаа Бор тээгийн ордтой холбоотойгоор “Эрдэнэс Монгол" ХХК-иас тайлбар, мэдээлэл хийлээ.

“Эрдэнэс Монгол" ХХК-ийн Уул уурхайн технологийн газрын дарга Ч.Алтанхүү:

-"Эрдэнэс Тавантолгой" ХК-ийн нэр дээр энэ лиценз байсан. "МТАС түншлэл" шалгарч, 36 сарын хугацаанд олборлолт хийх, нүүрс баяжуулж өгөх гэрээтэй байсан гэсэн үг. Үйлдвэр барихтай холбогдуулан үйлдвэр дээр гурван жилийн хугацаан газар олголтыг сумын иргэдийн хурлаас гарсан гэсэн үг. Зөвхөн үйлдвэрийнх нь барилгын газар болох 35 га газрыг түр хугацаагаар ашиглуулах зөвшөөрөл гарсан. Бид энэ зөвшөөрлийг цуцлуулж, өөрийн компанийн нэр дээр шилжүүлж авсан.

2024 оны нэгдүгээр сард УИХ-ын тогтоол гарснаар энэхүү "Админерал” компанид өгсөн 35 га газрыг 2024 оны нэгдүгээр сарын 5-ны өдөр Өмнөговь аймгийн Засаг дарга захирамж гаргаж, газрыг цуцалж, тухайн газрыг компанийн нэр дээрээ шилжүүлэн авсан. Одоогийн байдлаар Бортээгийн уурхайд ямар нэгэн олборлолтын үйл ажиллагаа явуулаагүй, компаниас нэг ч төгрөгийн зардал гаргаагүй ажиллаж байна.

“Эрдэнэс Монгол" ХХК-ийн Хууль зүйн хэлтсийн дарга Д.Оюунтуяа: 

-Өнгөрсөн 2024 оны УИХ-ын 9 дүгээр тогтоолоор "МТАС түншлэл"-тэй байгуулсан 2021 оны 750 дугаартай гэрээг цуцлах талаарх үүргийг УИХ-аас Засгийн газарт олгосон. Энэ дагуу тус компани дээр ажлын хэсэг байгуулагдан, нөхцөл байдлыг судалж, дүгнэлт гарган энэ компани гэрээ цуцлах хууль зүйн нөхцөл бүрдсэн гэдэг мэдээллийг 2025 оны нэгдүгээр сард өгсөн. Үүний дараа "МТАС түншлэл"-ээс энэ гэрээний дагуу Худалдаа хөгжлийн банкинд байршуулсан байсан гүйцэтгэлийн баталгаагаа цуцлуулах талаар хүсэлт ирүүлсэн байгаа. Тэр үед манай гэрээ цуцлах агуулгыг хүлээн зөвшөөрч байна гэж ойлгоод, гүйцэтгэлийн баталгааг цуцалсан. Ингэснээр гэрээний харилцаа үндсэндээ дууссан" гэв.