Намын даргын сонгуулиас үүдсэн УИХ-ын, Ерөнхий сайд нарын зөрчлөөс болж МАН тун чиг хүнд байдалд ороод байна. Ерөнхий сайд Г.Занданшатар УИХ-ын даргын эсрэг "нүүдэл" хийж гишүүн Б.Энхбаярыг Хууль зүй, дотоод хэргийн сайдаар томилж буйгаа мэдэгдсэн нь нэмэр дээр нэрмээс гэдэг болов. Үүний улмаас МАН-ын Хяналтын ерөнхий хороо өчигдөр орой хуралдаж, Б.Энхбаярыг МАН-аас хөөх шийдвэр гаргасан байдаг.

Дээрх асуудалтай холбоотойгоор УИХ-ын гишүүн Х.Баасанжаргал Хууль зүйн байнгын хорооны хуралдаан дээр дараах байр суурийг илэрхийлжээ. Тодруулбал, “Админерал” ХХК-ийн гүйцэтгэх захирлаар ажиллаж байсан "Х" уурхай дээрээ нас барсан хэргийг цагдаагийн байгууллага шалгаж байгаа эсэх, энэ хэргийг цагдаагийн байгууллага шалгаж байгаа бол УИХ-ын дарга Д.Амарбаясгаланг холбогдуулан шалгаж байгаа эсэхийг олон нийтийн өмнө нээлттэй асуух хэрэгтэй" гэж хэлээд олон нийтийн өмнө нээлттэй асуулга явуулах санал гаргасан байна.

Х.Баасанжаргал:

-“Монгол төрийн үйл ажиллагаа ийм байдалтай гацаж болохгүй. Хууль зүйн байнгын хорооны гишүүний хувьд Цагдаагийн ерөнхий газрын холбогдох албан тушаалтнуудыг дуудаж, нэр бүхий иргэн нас барсантай холбоотой хэргийг шалгаж байгаа юу. Шалгаж байгаа бол энэ асуудалд УИХ-ын дарга Д.Амарбаясгаланг холбогдуулан шалгаж байгаа юу гэдгийг олон нийтийн өмнө асуух хэрэгтэй.

Тийм чиг үүрэг УИХ-ын Хууль зүйн байнгын хороонд бий. УИХ-ын Хууль зүйн байнгын хорооны хуралдаанаар өмнө нь Ноорогтой холбоотой асуудлаар бид цагдаагийн байгууллага болон бусад хуулийн байгууллагын холбогдох албан тужшаалтнуудыг дуудаж тайлбар авч байсан. Хууль зүйн байнгын хороонд албан ёсны бүтцүүд ажиллах ёстой” гэжээ.