УИХ-ын гишүүн Б.Энхбаяр өнөөдөр Төрийн ордонд мэдээлэл хийв.
Тэр энэ үеэр "Ерөнхий сайд Г.Занданшатар өөрийн бүрэн эрхийн хүрээнд намайг Хууль зүй, дотоод хэргийн сайдаар томилж буйгаа мэдэгдсэн. Гэтэл манай намын Хяналтын ерөнхий хороо өчигдөр үүр шөнөөр хуралдаж, намайг МАН-ын гишүүнээс хөөх шийдвэр гаргасан байна. Хяналтын ерөнхий хорооны 4-5 гишүүн нүүрсний сонсголд гэрчээр оролцсон хүмүүс байна. Би нүүрсчидэд хөөгдөхгүй, нүүрсчдийг эх орноосоо хөөнө" гэв.
Сануулахад, МАН-ын Хяналтын ерөнхий хороо 21 гишүүнтэй. Өнгөрөгч шөнө хуралдсан Хяналтын ерөнхий хорооны хурал дээр 11 гишүүн Б.Энхбаярыг намаас хөөх санал өгчээ.
Хяналтын ерөнхий хорооны энэ шийдвэрийг эсэргүүцэж УИХ дахь МАН-ын бүлгийн долоон гишүүн өнөөдөр хэвлэлийн бага хурал зохион байгуулсан. Тэд энэ үеэр "Хяналтын ерөнхий хороо шийдвэрээ эргэж харахгүй бол бид УИХ дахь МАН-ын бүлэг болон МАН-аас гарна. Гэмт хэргийг шүүхээр нотлоогүй бол гэм буруугүй гэдэг зарчим УИХ-ын дарга Д.Амарбаясгалан, гишүүн Б.Энхбаяр нарт ижил тэгш үйлчлэх ёстой. Б.Энхбаяр гишүүнийг худал мэдээлэл хийсэн бол хуулийн байгууллага шалгаж тогтоох ёстой. Д.Амарбаясгалан даргын нүүрсний хэрэгтэй холбоотой эсэхийг ч мөн хамтад нь шалгах ёстой" гэсэн юм.
