Манай улсад тогтвортой аялал жуулчлалыг хөгжүүлэхэд хамтын ажиллагаа түншлэл, нутгийн гар урчуудын бүтээлч сэтгэлгээ болон аялал жуулчлалын төрлөө байгальд, соёлд ээлтэй хөгжүүлэх нь чухал байна.

Иргэд орон нутгаа маш сайн мэддэг учир салбарын тур компаниудын аялал жуулчлалын хөтөлбөрийг баяжуулахад туслуулах, оролцуулах, нутгийн иргэдийг хөтөч тайлбарлагчаар бэлдэх хэрэгтэйг тогтвортой аялал жуулчлалын хөгжил, маркетинг, брэнд хөгжүүлэх зөвлөх Катерин Жермьер-Хамел “Тэгш боломж бүхий, олон талт аялал жуулчлалын үнэ цэнд тулгуурлан нутгийн иргэдэд түшиглэсэн соёлын аялал жуулчлалыг хөгжүүлэх нь” илтгэлийнхээ үеэр онцов.

Тэрбээр СУИС, Залуу монголч судлаач, эрдэмтдийн “Эрдмийн хэлхээ” нийгэмлэг, Аялал жуулчлалын боловсрол хөгжлийн нийгэмлэг хамтран зохион байгуулсан тогтвортой аялал жуулчлал, түүний үнэ цэнд тулгуурласан нутгийн иргэдийн оролцоо лекцийн гол илтгэлийг тавьсан юм. Илтгэлдээ, Монгол Улс соёл болон байгалийн өв, үнэт зүйлсээр маш баялаг орон болохыг тодотгоод, тогтвортой аялал жуулчлал нь байгалийн баялгаа хэрхэн хамгаалж хадгалах зорилготой. Үүндээ тулгуурлан аяллын зарим чиглэлээ илүү үнэ цэнтэй, бусдыг өөртөө татахад ашиглах, тухайн бүс нутгийн иргэдийн тогтвортой байдлыг чадавхжуулж, эдийн засгийн хөгжлийг дэмжих зорилготой. Энэ нь эргээд бүтээгдэхүүн гэхээс илүү иргэдээ дэмжих хэрэгсэл болгоно гэсэн үг юм гэдгийг хэлж байлаа.

Энэ үеэр СУИС-ийн Соёл судлалын тэнхмийн эрхлэгч доктор Б.Мөнхбадрал ярихдаа, “Нутгийн иргэдээ түшиж аялал жуулчлалыг хөгжүүлэх зөвлөмж сургалтыг салбарынхан, ирээдүйн хүний нөөцөд өгч байна. Энэ багшийн судалгааны чиглэл нь манай улсын аялал жуулчлалын хандлага, баримталж буй бодлоготой нийцэж байгаа юм. Энэ цаг үед байгаа аялал жуулчлалын бүх нөөцөө тогтвортой, зөв төлөвлөлтөөр ирээдүйд ээлтэй байдлаар ашиглах тухай ярьж байна” гэв.