Ерөнхий сайд Г.Занданшатар өчигдөр УИХ-ын гишүүн Б.Энхбаярыг Хууль зүй, дотоод хэргийн сайдад томилж байгаагаа танилцуулахаар УИХ-д хүргүүлжээ. Гэтэл орой нь МАН-ын Хяналтын ерөнхий хороо өчигдөр үдээс хойш хуралдаж, Б.Энхбаярыг МАН-өөс хөөх шийдвэр гаргасан байна. Хяналтын ерөнхий хорооны 21 гишүүнээс 11 гишүүн дэмжсэн байна.
Уг шийдвэртэй холбогдуулан УИХ-ын МАН-ын бүлгийн гишүүд өнөөдөр /2025.10.02/ мэдээлэл хийв. МАН-ын Хяналтын хороо Б.Энхбаяр гишүүнийг хөөсөн асуудлаа эргэн харахгүй бол гишүүн М.Бадамсүрэн, З.Мэндсайхан, Б.Заяабал, Д.Энхтүвшин, Л.Соронзонболд, Д.Бум-Очир, Б.Хэрлэн нар МАН-ын бүлэг, МАН-аас гарна гэдгээ мэдэгдэв.
Гишүүдийн зүгээс:
-"МАН-ын дүрмээр намын гишүүн авлигын хэрэгт холбогдсон бол тухайн хэрэг хуулийн байгууллагаар тогтоогдсоны дараа намын гишүүнээс түдгэлзүүлэх эсэх асуудлыг хэлэлцэх ёстой. Б.Энхбаяр гишүүнийг намаас хөөж байгаа нь МАН авлигын эсрэг үйл хэргээсээ ухарч байгаа хэрэг болно. Бидэнтэй санал нэг байгаа олон гишүүн байгаа. Намын дүрмээр намыг гишүүнийг түдгэлзүүлэх хэдхэн заалт бий. Гэтэл Б.Энхбаяр гишүүнийг аль заалтаар түдгэлзүүлж байгаа нь тодорхойгүй байна. Бид шударга ёсны төлөө дугарсан гишүүнээ намаас хөөгөөд байвал нам дотор дарангуйлал тогтох нь цаг хугацааны асуудал. МАН-ын Хяналтын ерөнхий хорооны шийдвэр МАН-ын нийт гишүүдийн саналыг төлөөлөхгүй" гэсэн мэдэгдлийг хийлээ.
