Хот байгуулалт, барилга, орон сууцжуулалтын сайд Э.Бат-Амгалан Оросын Холбооны Улсаас Монгол Улсад суугаа Онц бөгөөд Бүрэн эрхт Элчин сайд Алексей Николаевич Евсиковыг хүлээн авч уулзлаа.

Уулзалтад ОХУ-аас Монгол Улсад суугаа Худалдааны төлөөлөгч Максим Викторович Васильев болон тус яамны нэгдүгээр нарийн бичгийн дарга Станислав Сергеевич Безруков болон бусад албаны хүмүүс оролцов.

Уулзалтын эхэнд сайд Э.Бат-Амгалан өнөөгийн барилгын салбарын хөгжилд Зөвлөлт Холбоот Улсын оруулсан хувь нэмэр, үлэмж их байсныг дурдаад, “Монгол, Орос хоёр улс цаг уур, бүс нутаг, газар зүйн хувьд төстэй нөхцөлд оршдог тул барилгын норм, стандарт, технологийн чиглэлээр харилцан суралцах, туршлага солилцох өргөн боломж бий. Ялангуяа угсармал орон сууцны ашиглалт, шинэчлэл болон эрчим хүчний үр ашгийг нэмэгдүүлэх чиглэлээр Оросын туршлагыг Монголд нэвтрүүлэх сонирхолтой байна” хэмээн онцоллоо.

Элчин сайд А.Н.Евсиков мөн талархал илэрхийлээд “Монгол Улсад барилгын салбарт Орос, Хятад Улс нь хамгийн ойр, чухал түншүүдийн нэг бөгөөд хамтын ажиллагааны өргөн боломж нээлттэй байна” хэмээн дурдав. Түүнчлэн барилгын салбарын чиглэлээр инженер, мэргэжилтэн, боловсон хүчин сургах, бэлтгэх чиглэлд Оросын тал байнга нээлттэй, дэмжлэг үзүүлэхэд бэлэн гэдгээ илэрхийлэв.

Мөн Монгол Улсын баруун аймгуудаар аялал жуулчлал эрчимтэй хөгжиж буйг тэмдэглээд, энэ салбарт хоёр тал хамтран ажиллах боломж байгааг дурдав. Тухайлбал, сүүлийн жилүүдэд маш ихээр баригдаж байгаа амралтын газруудыг орчин үеийн чиг хандлагад нийцсэн дэд бүтэцтэй болгох, ялангуяа ариун цэврийн байгууламж, ногоон барилгын асуудлыг шийдвэрлэхэд ОХУ-ын туршлага, шийдлийг нэвтрүүлэх боломжтой гэдгийг санал болголоо.

Саяхан хоёр улсын Засгийн газар Евро Азийн худалдааны хэлэлцээрт гарын үсэг зурж, харилцан ашигтай худалдаа хийх тохироонд хүрсэн нь чухал алхам болсныг тэмдэглэв. Ялангуяа Монголд үйлдвэрлэсэн барилгын материал болох гантиг, чулуу, цемент, барилгын дулаалгын хөвөн, ноосон материал зэргүүдийг ОХУ-руу экспортлох бүрэн боломжууд байгааг онцлов. Энэхүү хэлэлцээрийг эрх бүхий байгууллагаар соёрхон батлуулахад Улсын Хурлын гишүүний хувиар дэмжлэг үзүүлэхийг хүсэв.

Оросын талаас Дарханы төмөрлөгийн үйлдвэрийг дагасан төмөр эдлэл, хийцийн бүтээгдэхүүн үйлдвэрлэх боломжтойг дурдаж, энэ чиглэлийн хамтын ажиллагааны бодитой саналуудыг судлахыг хүсэв.

Мөн ОХУ нь хуучны барилгын салбарын норм, дүрмээ бүрэн шинэчилж, эдгээр шинэчилсэн бүх норм, дүрмийг Монголын талд гардуулахад бэлэн байгааг илэрхийлэв.

Цаашид Монгол, Оросын Засгийн газар хоорондын комиссын дор зохион байгуулагддаг хоёр улсын барилгын асуудал эрхэлсэн яам хоорондын дэд комиссыг сэргээх асуудалд талууд харилцан тохиров гэж Хот байгуулалт, барилга, орон сууцжуулалтын яамнаас мэдээллээ.