Ерөнхий сайд Г.Занданшатар өнөөдөр Төрийн ордонд сэтгүүлчдэд мэдээлэл хийлээ. Энэ үеэр өнгөрсөн гурван сарын хугацаанд эдийн засгаа сэргээхийн тулд Засгийн газраас авч хэрэгжүүлсэн арга хэмжээ, хүрсэн үр дүн болон өнгөрсөн гурван жилд олон нийтийг бухимдуулсан нүүрсний хулгайн талаар зарим мэдээллийг ил болгов. 

Г.Занданшатар: 

-"Нэг их наяд төгрөгөөр барьсан нүүрс баяжуулах үйлдвэрийг уурхайгаас нь 18 км-ын цаана байгуулсан. Энэ хооронд 1,5 сая төгрөгөөр тээвэр хийдэг байсан, онцгой дэглэм тогтоосноор 400 мянган төгрөг болж буурсан.

Долдугаар сарын 19-ний өдөр ЭТТ компанийн уурхай дээр очиж ажиллахад олон арван хулгайн тухай яригдсан. Бүгдийг нь таслан зогсоож АТГ-т шилжүүлсэн. Баяжуулах үйлдвэрээ Бор тээгийн уурхайн аман дээр барьчихсан, тэр нь ашиглагддаггүй. Тээвэрлэлт нь асар өндөр өртөгтэй, дахиад 280 тэрбум төгрөгөөр конвер барих тухай ярьж байна. Конверийг барьж дуустал нөгөө нэг их наядын үйлдвэр маань ашиггүй. 10-30 сая тонн нүүрс угаах хүчин чадалтай баяжуулах үйлдвэр маань ашиглалтанд орсон бол нөгөө 44 их наядын хулгайгаас давсан орлогыг Монгол Улсад ирээдүйд, урт хугацаандаа оруулах боломжтой байлаа. Энэ үйлдвэр бараг ажиллахгүй, сул зогсож байна. Ийм үрэлгэн замбараагүй байдалтай байсан. Үйлдвэрийг ашиглахын тулд өнөөдөр 280 тэрбум төгрөгөөр конверийн шугам барьж байна. 

Эдийн засгаа сэргээхийн тулд Монгол Улсын 2026 оны төсвийн төслийг өргөн барьсан. Ингэхдээ Тавантолгойн орд газраас эдийн засгийн эргэлтэд ороогүй цорын ганц орд болох Бор тээгийн ордыг эдийн засгийн эргэлтэд оруулах саналаа улсын нэгдсэн төсөвтэй хамтад нь УИХ-д өргөн барьсан. Бор тээгийг ордыг ашиглах тухай төсөл өргөн баримагц, гуравхан сарын өмнө "намын даргад нэр дэвшихгүй" гэж байсан УИХ-ын дарга маань яаран сандран мэдэгдэл хийж эхэлсэн, намын даргад өрсөлдөхөөр болсон.

Залуучууд нүүрсний хулгайтай тэмцэхээр гудамжинд өлсгөлөн, суулт, жагсаал зохион байгуулж байсан. Нүүрсний хулгайтай хийх тэмцэлд УИХ-ын даргатай хамтран зүтгэнэ гэж би итгэж байсан. Нүүрсний хулгайтай холбогдсон гэдэгт итгэхийг хүсээгүй. Харамсалтай УИХ-ын дарга энэ асуудалд нэр холбогдсон байсан.

Өнөөдөр тэд эвлэлдэн нэгдэх тухай ярьж байна. Эв нэгдэл шударга ёсонд суурилах ёстой. Нүүрсний хулгайтай хийх тэмцлээ илүү эрч хүчтэй үргэлжлүүлэхийн тулд өөрт олгогдсон бүрэн эрхийн дагуу УИХ-ын гишүүн Баттөмөрийн Энхбаярыг Хууль зүй, дотоод хэргийн сайдад томилж байна" гэв.