УИХ-ын дарга Б.Амарбаясгалан Бага хурлын гишүүдийн 85.67 хувийн санал авч, МАН-ын даргаар сонгогджээ. МАН-ын Их хурлыг арваннэгдүгээр сарын 15-ны өдөр хийхээр тогтсон тухай хуралдаан даргалагч Ж.Бат-Эрдэнэ өнөөдөр өглөө /09.20 цагт/ мэдээлжээ.

Ингэхдээ санал хураалт явуулахын өмнө тооллогын комисс санал хураалтын журмыг баталж, нэр дэвшигчийн авсан санал нийт саналын гуравны хоёрт хүрэхгүй бол хамгийн олон санал авсан хүнийг хоёр дахь шатны санал хураалтад оруулахаар тогтжээ. Эхний санал хураалтад нэр дэвшигч Д.Амарбаясгалан 56,2 хувийн санал, Г.Занданшатар 43,98 хувийн санал авсан байна. 

Эхний шатны санал хураалтад 428 төлөөлөгч оролцсон бол хоёр дахь шатны санал хураалтад Бага хурлын 321 гишүүн оролцож, 85,67 хувийн саналаар Д.Амарбаясгалан ялалт байгуулжээ. Г.Занданшатарыг дэмжиж санал өгсөн Бага хурлын гишүүд хоёр дахь шатны санал хураалтад оролцоогүй байна. Санал хураалтад оролцсон 321 гишүүний 46 нь цагаан хуудсаар санал өгсөн бөгөөд Д.Амарбаясгалан 275 төлөөлөгч буюу 85,67 хувийн саналаар МАН-ын дарга болсон байна. 

Сануулахад, Бага хурлын гишүүдийн 2/3-ын санал авсан нэр дэвшигчийг намын даргаар сонгогдсоноор тооцох дүрэмтэй. 2/3-ын санал авч чадаагүй бол намын их хурлаас шийдвэр гаргах ёстой. Гэвч Д.Амарбаясгалангийн хувьд Бага хурлын гишүүдийн 58 хувийн саналтайгаар намын Их хурал руу орохыг хүсээгүй бололтой. Тиймээс хоёр дахь шатны санал хураалт явуулжээ, нэгдүгээрт.

Хоёрдугаарт, "Намын Их хурлын чөлөөт цагт намын дарга орон гарвал Бага хуралд оролцсон гишүүдийн гуравны хоёрын саналаар шинэ даргыг сонгоно" /дүрмийн 20.3.7/ гэж заасан. Гэтэл өнгөрсөн шөнийн байдлаар Л.Оюун-Эрдэнийн огцрох өргөдлийг хэлэлцэлгүйгээр /намын даргаас чөлөөлөлгүйгээр/ дараачийн нэр дэвшигчдийг хэлэлцсэн гэдгийг Бага хурлын нэр бүхий гишүүд хэлсэн. Өөрөөр хэлбэл, "орон гараагүй байхад" дараачийн даргыг тодруулсан болж байна. Энэ нь Улс төрийн намын тухай хууль болон намын дүрэм зөрчсөн асуудлаар шүүхэд маргаан дагуулах вий гэдэг болгоомжлол Бага хурлын гишүүдийн дунд байна.