МАН-ын даргад нэр дэвшиж байгаа УИХ-ын дарга Д.Амарбаясгалан, Ерөнхий сайд Г.Занданшатар нар намын Бага хурлын гишүүдэд мөрийн хөтөлбөрөө танилцуулж, Бага хурлын гишүүд асуулт асууж, хариултаа авсны дараа хуралдаан түр завсарлаад байна.
Хуралдааны завсарлагаар сэтгүүлчид Бага хурлын гишүүдээс асуулт асууж, тодруулга авах үеэр Бага хурлын гишүүг М.Оюунчимэг нэгэн "ноцтой" мэдээллийг дамжуулав.
Тодруулбал, МАН-ын намын дарга Л.Оюун-Эрдэнэ огцрох өргөдлөө өгсөн боловч хуралдаан даргалагч /УИХ дахь МАН-ын бүлгийн дарга/ Ж.Бат-Эрдэнэ өргөдлийг хэлэлцүүлээгүй. Хяналтын хорооны дарга н.Баярбат "Асуудал гарахгүй, хариуцлагыг би хүлээнэ" гэсэн байна.
МАН-ын дүрэмд зааснаар /20.3.7/ "Намын Их хурлын чөлөөт цагт намын дарга орон гарвал Бага хуралд оролцсон гишүүдийн гуравны хоёрын саналаар шинэ даргыг сонгоно" гэжээ. Гэтэл өнөөдөр МАН-ын Бага хурал намын даргаа чөлөөлөхгүйгээр дараачийн нэр дэвшигчдийг хэлэлцсэн байна.
Энэ нь өмнө мэдээлсэнчлэн, Л.Оюун-Эрдэнэ "намын шинэ дарга тодорсны дараа өргөдлөө өгнө" гэсэнтэй холбоотой бололтой. Л.Оюун-Эрдэнийн намын даргаас чөлөөлөгдөх хүсэлтийг хэлэлцэж, шийдвэр гаргаагүй тохиолдолд намын Бага хурлын шийдвэр дүрмийн бус болно гэсэн үг.
