Г.Занданшатарын Засгийн газрын 100 хоног өчигдөр тохиов. Ерөнхий сайд Г.Занданшатар энэ өдөр өөрийн нүүр номд,

-"Өнөөдөр Засгийн газрын 100 дахь өдөр. Хийх ажил, хуримтлагдсан асуудал ч их байна. Хамгийн сайн улс төр бол хийсэн ажил, шийдсэн асуудал, үр дүн гэдэг. Эдийн засгийн хүндрэл хямрал болж даамжрах аюулыг бид зогсоож, эдийн засгаа сэргээж чадлаа. Төмөртэйн овоо, Төгрөг нуурын ордуудаар Баялгийн санг арвижуулж эхэллээ. Урдах ажилдаа анхаараад удаа дараа мэдэгдэл хийх цаг ч, сонирхол ч байгаагүйг эрхэм журмын нөхөд маань ойлгоно гэдэгт итгэж байна.

Худал, хулгай, хуйвалдааны замаар зорилгодоо хүрэх нь миний зарчим биш. Албан тушаалын төлөө журмын нөхдөө гүтгэж, хэлээгүйг хэлсэн мэт, хийгээгүйг хийсэн мэт ярьж, УИХ, Засгийн газар, нийгмээ, намаа талцуулж байгаа нь төрийн хүнд байх ёс зүй, мөн чанар огтхон ч биш ээ. Хийсэн ажилтай, хэлэх үгтэй очно. Нүүр нүүрээ харж, үнэн худлыг дэнсэлцгээе" хэмээн нийтэлжээ.

Өнгөрөгч зургадугаар сард Ерөнхий сайд Л.Оюун-Эрдэнэ "өөрийн гэр бүлийн орлогыг нотолж чадаагүй" гэдэг үндэслэлээр АТГ-т шалгуулж, УИХ Засгийн газарт итгэл үзүүлэхгүй гэснээр Ерөнхий сайдын суудлаас огцорсон. Түүний дараа МАН-ын Бага хурлаас олонхын дэмжлэг авсан Г.Занданшатарыг Ерөнхий сайдаар томилсон.

Харин өнөөдөр МАН-ын Бага хурал хуралдаж, Л.Оюун-Эрдэнийг намын даргаас чөлөөлөх, шинэ даргаа томилохоор хэлэлцэж байна. Тиймээс Ерөнхий сайд Г.Занданшатарын өчигдөр нийтэлсэн энэ үг өнөөдөр хуралдаж байгаа МАН-ын Бага хурлын гишүүдэд хаяглагджээ.