БНХАУ-аас Монгол Улсад суугаа Элчин сайдын яамнаас өнөөдөр ШХАБ-ын дээд хэмжээний уулзалт болон Дэлхийн II дайн, Хятадын ард түмэн Японы эсрэг дайнд ялалт байгуулсны 80 жилийн ойн баярт зориулсан үйл ажиллагааны үр дүн, ач холбогдлын талаар хэвлэлийн хурал хийв.
БНХАУ-аас Монгол Улсад суугаа Онц бөгөөд Бүрэн эрхт Элчин сайд Шэнь Миньжуань мэдээллийнхээ эхэнд, “Анх зургаан улстайгаар үүсэн байгуулагдаж байсан ШХАБ нь өнгөрсөн 24 жилийн хугацаанд дэлхийн хамгийн олон хүн амыг хамарсан, хамгийн өргөн газар нутагтай, хамгийн их хөгжлийн боломжтой бүс нутгийн хамтын ажиллагааны байгууллага болжээ. Саяхан өндөрлөсөн ШХАБ-ын Тяньжиний дээд хэмжээний уулзалт нь өнөөг хүртэлх хугацааны хамгийн өргөн цар хүрээтэй, хамгийн арвин үр дүнтэй уулзалт боллоо.
БНХАУ-ын дарга Ши Жиньпин тус дээд хэмжээний уулзалтын хүрээнд Даян дэлхийн засаглалын санаачилгыг дэвшүүлсэн нь хамгийн онцлох үйл явдал болов. Даян дэлхийн засаглалын санаачилга нь үндсэн таван үзэл баримтлалыг агуулж буй. Үүнд, тусгаар улсын бүрэн эрх, эрх тэгш байдлыг эрхэмлэх, олон улсын хууль, эрх зүйг дээдлэх, олон талт үзлийг хэрэгжүүлэх, хүн төвтэй хандлагыг уриалах, үйл ажиллагааны чиг баримжааг анхаарах зэрэг явдал юм. Даян дэлхийн санаачилга нь БНХАУ-ын даргын өмнө нь дэвшүүлсэн Даян дэлхийн хөгжлийн санаачилга, Даян дэлхийн аюулгүй байдлын санаачилга, Даян дэлхийн соёл иргэншлийн санаачилгатай харилцан уялдаатай. Энэ удаагийн дээд хэмжээний уулзалт 8 чухал үр дүнд хүрсний дотор ШХАБ-ын ирэх 10 жилийн хөгжлийн стратегийг баталсан явдал байлаа” хэмээн онцлов.
Түүнчлэн Элчин сайд мэдээлэлдээ, "Монгол Улсын Ерөнхийлөгч У.Хүрэлсүх ШХАБ-ын дээд түвшний уулзалт, хоёр болон гурван талт уулзалтад тус тус оролцсон. Ерөнхийлөгч нар уулзалтынхаа үеэр төрийн тэргүүн нарын манлайлал дор хоёр орны харилцаа, хамтын ажиллагаа бүхий л салбарт өргөжин хөгжиж, тасралтгүй гүнзгийрч байгааг сайшаасан. Мөн үеэр талууд хамтын ажиллагааны таван баримт бичигт гарын үсэг зурсан. Тухайлбал, “Монгол Улсаас Бүгд Найрамдах Хятад Ард Улсад экспортлох үеийн зөгийн балд тавигдах хяналт, хорио цээр, мал эмнэлгийн ариун цэврийн шаардлагын тухай Монгол Улсын Хүнс, хөдөө аж ахуй, хөнгөн үйлдвэрийн яам, Бүгд Найрамдах Хятад Ард Улсын Гаалийн ерөнхий газрын хоорондын протокол”-д гарын үсэг зурсан нь хөдөө аж ахуйн бүтээгдэхүүнийг төрөлжсөн чиглэлээр нийлүүлэхэд чиглэсэн нэгэн чухал алхам болсон. Түүнчлэн тус үеэр Монгол Улс, БНХАУ, ОХУ-ын төрийн тэргүүн нарын VII уулзалт болсон нь гурван жилийн дараах уулзалт юм. Энэ удаагийн уулзалт нь гурван талт хамтын ажиллагаа тогтвортой урагшилж, бодит үр дүн гарч буйг илтгэж байна” гэлээ.
БНХАУ-аас Монгол Улсад суугаа Онц бөгөөд Бүрэн эрхт Элчин сайд Шэнь Миньжуань Дэлхийн II дайн, Хятадын ард түмэн Японы эсрэг дайнд ялалт байгуулсны 80 жилийн ойн баярт зориулсан арга хэмжээ Бээжин хотноо ёслол төгөлдөр болж өнгөрсөн болохыг хэлээд, тэрбээр Монгол Улсын Ерөнхийлөгч У.Хүрэлсүх тэргүүтэй төлөөлөгчдийн хамт оролцсон нь түүнд онцгой сэтгэгдэл үлдээсэн хэмээн дурслаа. Үүний зэрэгцээ Монгол Улсын Ерөнхийлөгч У.Хүрэлсүх Жанчхүүгийн даваан дахь Монгол-Зөвлөлтийн дайчдад зориулсан дурсгалын цогцолборт зочилж, амь үрэгдсэн дайчдын дурсгалын хөшөөнд хүндэтгэл үзүүлж, цэцэг өргөсөн нь түүхийг бүдгэрүүлэхгүй, үүрд санан дурсаж явах ёстойг сануулсан хэрэг боллоо” хэмээв.
Элчин сайдын мэдээллийн дараагаар сэтгүүлчид хөгжлийн төслүүд, түүний явц, хэрэгжүүлэх боломжуудын талаар асууж, хариулт авав.
