Монгол Улсын гурав дахь Ерөнхийлөгч Н.Энхбаяр өнөөдөр хэвлэлийн хурал хийж Гашуунсухайт–Ганцмод боомтын хил дамнасан төмөр замын бүтээн байгуулалтын хүрээнд байгуулсан нүүрс худалдаалах гэрээг шүүмжиллээ. Тэрээр 2024 онд УИХ-аас баталсан 58 дугаар тогтоолын дагуу Засгийн газар БНХАУ-тай хэлэлцээр байгуулсан ч энэ нь Монголын эдийн засгийн эрх ашигт ашиггүй, улсад асар их хохирол авчрах эрсдэлтэй гэж мэдэгдэв.

Түүний хэлснээр гэрээнд нийт 250 сая тонн нүүрс нийлүүлэхээр тусгагдсан бөгөөд үүний 55 хувь нь Монголын хамгийн үнэ цэнтэй коксжих нүүрс байгаа бол 35 хувь нь дунд зэргийн чанартай ангиллын нүүрс, үлдсэн 10 хувь нь хамгийн бага үнэтэй чулуун нүүрс байна. Ийнхүү гэрээгээр Монголын коксжих нүүрсний бараг 40 хувийг урьдчилсан байдлаар худалдахаар болж, тонн тутамд ойролцоогоор 40 ам.долларын алдагдал хүлээхээр байгаа аж. Үүнийг нийт 250 сая тонноор үржүүлэхэд 10 тэрбум ам.долларын алдагдал тооцогдохоор байна гэж тэр тайлбарлав.

Мөн гэрээний хугацааг 16 жилээр тогтоосон нь Монголын нүүрсний зах зээлд ирээдүйд гарах боломжит ашигтай нөхцөлүүдийг бүрэн хааж, улсын эдийн засгийн уян хатан байдлыг алдагдуулж байна гэж тэр нэмж хэлэв. Н.Энхбаярын үзэж буйгаар Гашуунсухайт–Ганцмодын хил дамнасан төмөр зам өөрөө стратегийн ач холбогдолтой боловч түүнд дагалдсан нүүрс худалдах гэрээ нь Монголын эрх ашигт харш шийдвэр болсон байна.