Гадаад харилцааны сайд Б.Батцэцэг Японы “Ёс зүйн нийгэмлэг”-ийн тэргүүн Ито Наоког энэ сарын 10-нд хүлээн авч уулзав.

Сайд Б.Батцэцэг нийтлэг үнэт зүйлс бүхий Монгол Улс, Япон Улсын харилцаа хоёр талын үе үеийн төр, нийгэм, урлаг, соёлын зүтгэлтнүүд, ард иргэдийн сэтгэл, зүтгэлийн үрээр эдүгээ “хүн төвтэй” “Энх тайван, хөгжил цэцэглэлтийн төлөөх Тусгай стратегийн түншлэл”-ийн өндөр түвшинд өргөжин хөгжиж буйг тэмдэглэж, ийнхүү харилцаа, хамтын ажиллагааг бүхий л чиглэлд гүнзгийрүүлэн хөгжүүлэхийн төлөө ажиллаж байгаагаа илэрхийлэв.

Тэрбээр Монгол, Японы соёл, урлагийн харилцааг өргөжүүлэх, эрүүл мэнд, эмнэлгийн салбарын хүний нөөцийг чадавхжуулах зэрэг өргөн хүрээний салбарт үнэтэй хувь нэмэр оруулж ирсэнд хатагтай Н.Итод талархал илэрхийлээд, түүний санаачилгаар Улаанбаатар хотод Монгол, Японы хамтарсан “Ёс жудаг” уран бичвэрийн үзэсгэлэн дэлгэгдэж буйд баяр хүргэв.

Н.Ито энэхүү хамтарсан үзэсгэлэнгээр дамжуулан Монгол, Японы найрсаг харилцаа, ард иргэдийн харилцан ойлголцол, найрамдал нөхөрлөлийг улам бүр гүнзгийрүүлэх эрмэлзэлтэй, цаашид эл чиглэлд үргэлжлүүлэн идэвх зүтгэл гарган ажиллахаа илэрхийлэв. Энэ сарын 10-20-нд “Чингис хаан” Үндэсний музейд гарч буй Монгол, Японы хамтарсан “Ёс жудаг” уран бичвэрийн II үзэсгэлэнд хоёр талын улс төр, соёл, урлаг, олон нийтийн байгууллага, найрамдлын нийгэмлэгийн төлөөлөгчдийн 40 гаруй бүтээлийг дэлгэсэн байна.

“Ёс жудаг” уран бичвэрийн анхдугаар үзэсгэлэн Улаанбаатар хотод 2018 онд гарч байсан юм. Японы “Ёс зүйн нийгэмлэг” нь 1980 онд үүсгэн байгуулагдсан бөгөөд хувь хүний ёс зүй, хүмүүжил, ёс суртахууны төлөвшилтэд чиглэсэн яриа, уулзалт зэргийг зохион байгуулах, сэтгүүл гаргах зэргээр үйл ажиллагаагаа явуулдаг.