ЗГХЭГ-ын дарга С.Бямбацогт өнөөдөр Эрчист Монгол нэгдлийн ТУЗ-ийн гишүүд болон гүйцэтгэх удирдлагатай уулзаж, үйл ажиллагаанд нь ахиц гаргах тодорхой чиглэл өглөө. Тэрбээр өмнө нь Эрдэнэс Монгол нэгдлийн ТУЗ-ийн даргаар ажиллаж, үр дүнд хүргэж байсан Ш.Мөнхцэрэнг Эрчист Монголын ТУЗ-ийн даргаар томилсныг онцолж, шинэ удирдлагын баг богино хугацаанд дорвитой үр дүн үзүүлэх ёстойг тодотгосон байна.

Уулзалтын үеэр С.Бямбацогт хэд хэдэн чиглэл өгсөн бөгөөд үүнд: Засгийн газрын 100 хоногийн төлөвлөгөөний биелэлтийг танилцуулах, харьяа компаниудын зохион байгуулалтын асуудлыг бүрэн цэгцлэх, борлуулалтын орлогыг нэмэгдүүлж, үйл ажиллагааны зардлыг бууруулах зэрэг багтжээ. Мөн улс, орон нутгийн төсөвт оруулах татварын орлого, гадаад валютын албан нөөцийг нэмэгдүүлэх бодит шийдэл гаргах, төрийн өмчит компаниудын үр ашиггүй зардлыг бууруулах, үйл ажиллагааны ил тод байдлыг хангахыг даалгав.

Түүнчлэн нэгдлийн хэмжээнд үйл ажиллагааны төлөвлөлт, ашиглалт, хяналтын нэгдсэн удирдлагын тогтолцоог бүрдүүлж, хувийн хэвшлийн сайн туршлагыг нэвтрүүлэх нь чухал гэдгийг тэмдэглэсэн байна.