Австралийн амбан захирагч (англ. Governor-General of Australia) гэдэг нь тус улсын төрийн тэргүүн буюу Их Британийн хаан III Чарльзын Австрали дахь албан ёсны төлөөлөгч юм.
Австралийн амбан захирагч Үндсэн хуулиар заасан Холбооны парламентын хуралдааныг зарлан хуралдуулах, тараах, сонгуулийн тов тогтоох, хууль тогтоомжийг хааны нэрийн өмнөөс эцэслэн батламжилж хүчин төгөлдөр болгох, парламентын олонхын шийдвэрийн дагуу ерөнхий сайд болон сайд нарыг томилох, чөлөөлөх, ерөнхийдөө Цэргийн Ерөнхий командлагчийн албан тушаалыг хэрэгжүүлэх, олон нийтийн ёслол, төрийн арга хэмжээг хааныг төлөөлөн удирдах гэх мэт бэлгэдлийн үүрэгтэй ажилладаг.
Австралийн амбан захирагчаар ажиллах нарийн тодорхой хугацаа тогтоогдоогүй байгаа ч ерөнхийдөө таван жилээр томилогддог бөгөөд ерөнхий сайдын зөвлөмжөөр сунгагдан ажиллаж болдог. Түүнийг Австралийн ерөнхий сайдын зөвлөмжийн дагуу Их Британийн хаан албан ёсоор батламжилж, томилолтын зарлиг гаргадаг.
Нийт зургаан муж улс нэгдэн Австралийн холбооны улс (Commonwealth of Australia) 1901 оны нэгдүгээр сарын 1-нд албан ёсоор байгуулагдаж, Викториа мужийн амбан захирагчаар ажиллаж байсан Жон Адриан Лукан Хоп Австралийн анхны амбан захирагчаар томилогдсон бол одоо 28 дахь амбан захирагчаар Саманта Мостин ажиллаж байна. Тэрээр Австралийн хоёр дахь эмэгтэй амбан захирагч бөгөөд 2024 оны долдугаар сарын 1-нээс хойш энэхүү албыг хашиж байна.
Саманта Мостин 1965 оны есдүгээр сарын 13-нд Австралийн Канберре хотод цэргийн даргын гэр бүлд төрж, бизнес эрхлэгч, өмгөөлөгч, спортын салбарын удирдагч, олон нийтийн үйл ажиллагааны идэвхтэн байсан. Тэрээр олон төрлийн байгууллагад удирдах болон зөвлөх үүрэг гүйцэтгэж байсан бөгөөд өөрийн гаргасан амжилтаар 2021 онд Officer of the Order of Australia (AO), харин 2024 онд Companion of the Order of Australia (AC) цол хүртжээ.
Өдрийн сонин
