Ерөнхий сайд Г.Занданшатар энэ сарын 8-нд Орхон, Сэлэнгэ аймгийн тариаланчидтай уулзаж, газар тариалангийн салбарын өнөөгийн байдал, ургац хураалтын явцтай танилцав. Тэрбээр улсдаа үр тариалалтаар тэргүүлж буй “Бүтлийн Ундарга” ХХК-ийн үйл ажиллагааг онцгойлон үзэж, компанийн бүтээн байгуулалт, технологийн шинэчлэлтэй танилцжээ. Тус компани нь өнгөрсөн 17 жилд нэг га талбайгаас дунджаар 45-53 центнер ургац хурааж, улсын рекордыг тогтоосон бөгөөд энэ онд 35-45 центнер ургац хурааж байгаа аж. “Атрын-4” аяны хүрээнд хөнгөлөлттэй зээл ашиглан бүрэн автоматжуулсан үр тариа цэвэрлэх, хатаах, хадгалах 3500 тонн багтаамжтай агуулах ашиглалтад оруулсан нь салбарын чадавхийг нэмэгдүүлж байна. Мөн улаанбуудайн үрийн шинэчлэлд Бурятская-Остистая, Гонец, Алтайская-70, Байкальская зэрэг сортын буудайг нутагшуулжээ.

Орхон аймагт энэ онд 5156 га талбайд тариалалт хийж, урьдчилсан балансаар 8958 тонн улаанбуудай, 1457 тонн төмс, 5760 тонн хүнсний ногоо, 1076 тонн тэжээл, 1393 тонн тосны ургамал хураахаар тооцоолж байна. Аймгийн хэрэгцээт улаанбуудайг бүрэн хангах, төмсний хангамжийн 50 хувь, хүнсний ногооны 80 хувийг дотоодоос хангах боломж бүрдсэн нь энэ жилийн хур тунадасны ахиу хэмжээнд холбоотой юм.

Тариаланчдын зүгээс аймагт улсын төсвийн хөрөнгөөр мянган тоннын багтаамжтай зоорь барих, тариалалтын талбайг 200 мянган га-аар нэмэгдүүлж эзэмшүүлэх эрх олгох саналаа Ерөнхий сайдад уламжилсан байна. Харин Ерөнхий сайд хөрөнгө оруулалтын үр ашгийг дээшлүүлэх, хүнсний аюулгүй байдлыг хангах зорилгоор тариалалтын талбайг нэмэгдүүлэх чиглэлд дэмжлэг үзүүлэхийг аймгийн удирдлагуудад үүрэг болгожээ.