Монгол Улсын Ерөнхийлөгч У.Хүрэлсүхийн ивээл дор болж буй Дэлхийн бизнес эрхлэгч эмэгтэйчүүдийн чуулга уулзалт өнөөдөр Улаанбаатар хотноо эхэллээ.

“Урам зориг өгөх-нөлөөлөл үзүүлэх, хөрөнгө оруулах” уриатай энэхүү чуулга уулзалт нь манай улсын хувьд эмэгтэйчүүдийг дэмжсэн дөрөв дэх удаагийн томоохон үйл ажиллагаа бөгөөд 25 улсын 230 гаруй зочин төлөөлөгч оролцож байна. Энэ үеэр жендерт суурилсан эдийн засаг-бизнесийн бодлого, хүний нөөц, хөрөнгө оруулалт, бизнесийн зах зээлд өрсөлдөх чадварыг нэмэх зорилготой сургалт, семинарууд болох юм. Мөн бизнес эрхлэгч эмэгтэйчүүдэд тулгардаг нийтлэг сорилтыг сонсож, хамтран шийдэхийг зорьж буй. Түүнчлэн бодлогын түвшинд жендерт суурилсан эдийн засгийг дэмжих, хамтын ажиллагааг бэхжүүлэх, хил дамнасан түншлэл, хөрөнгө оруулалтын шинэ гарцуудыг нээх бололцоотой гэж үзэж байна.

Үүний зэрэгцээ бизнес эрхлэгч эмэгтэйчүүдийн бараа, үйлчилгээг олон улсад сурталчлах, хөрөнгө оруулалт татах зорилготой үзэсгэлэн худалдааг энэ сарын 24-25-нд Сүхбаатарын талбайд гаргана. Үзэсгэлэнд 140 гаруй жижиг дунд үйлдвэрлэгч ноос ноолуур, гар урлал, IT технологи, аялал жуулчлалын бүтээгдэхүүн үйлчилгээгээ танилцуулах юм. B2B уулзалтаар бизнес эрхлэгчид харилцаа холбоо, санхүүжилтийн талаар хэлэлцэж, төслөө танилцуулах боломжийг бүрдүүлсэн.

Чуулганы хүрээнд эмэгтэйчүүдийн эдийн засгийн оролцоог нэмэх, манлайллыг төлөвшүүлэх, санхүү, хөрөнгө оруулалтын хүртээмж, дижитал өөрчлөлт ба инновац, ногоон хүртээмжтэй эдийн засгийг цогцлооход тэдний үүрэг оролцоо, дижитал эдийн засаг дахь эмэгтэй экспортлогчдыг дэмжих сан зэрэг салбар хуралдаан болох юм.