Дотоодын хөрөнгийн зах зээлд өөрийн гэсэн байр суурийг эзэлсэн ”Монголын хөрөнгийн бирж” ХК 2025 оны нэгдүгээр сард Гүйцэтгэх захирлын үүргийг түр орлон гүйцэтгэгч шинэ удирдлагатай болсон. Тэр бол өмнөх Засгийн газрын үед “Хурдасгуур төв”-ийн удирдлагаар ажилласан Хөгжлийн эдийн засагч гэх Б.Дөлгөөн юм.

Гэвч мань хүн биржийн удирдлагын ажлыг авсан цагаасаа хойш хувийн амбиц, алдар нэрийн араас улайран хөөцөлдөж, хаана л олон хүн цугласан газар байна тэр бүгдэд шургалан хурал, илтгэл, форум юу л таарна сэдэв голохгүй нэр, зургаа хавчуулан энд тэнд цохиж явж харагддаг.

Түүгээр ч зогсохгүй хөрөнгийн биржийн байрыг хувийнхаа өмч мэт ашиглан бирж дотор “студи”, хуулийн компани байршуулж, ажил хүлээн авахдаа дагуулж ирсэн эмэгтэйгээ биржээс цалинждаг хувийн туслах болгон, албаны туслахтайгаа зэрэгцүүлээд суулгаж байдаг гэнэ. Хөдөлмөрийн тухай хууль, байгууллагын дотоод журмаа зөрчин сонгон шалгаруулалт зарлахгүйгээр олон хүнийг ажилд авсан бөгөөд өдгөө нийт ажилтнуудын 50 хувийг чөлөөлөх, оронд нь ирэх сонгуульд өөрт нь ажиллах хүмүүсээ компанийн мөнгөөр тэжээх далд санаархлаа ил хэрэгжүүлж эхэлсэн байна.

Тухайлбал, МХБ-ийн үндсэн дөрвөн хуульч өдөр тутмын  ажлаа хэвийн явуулж байхад биржийн дотоодод гаднаас хуулийн фирм байршуулсан, байгууллагын дотоод мэдээллийг ашиглуулан МХБ-ээр дамжуулан IPO хийсэн системийн нөлөө бүхий банкуудад тус хуулийн фирмээр дамжуулж тусгай үйлчилгээ үзүүлж буй ноцтой үйлдэл үргэлжилж байгаа юм байна.

Түүнчлэн Б.Дөлгөөн НИТХ-ын сонгуульд өөрийнх нь сошиал сувагт видео, текст оруулж ажилласан багийнхнаасаа биржид орон тоогоор ажиллуулан цалинжуулж, ажилд орж амжаагүй нь биржийн ажилтан мэт дуртай цагтаа орж гардаг бүрэн эрхтэй болжээ. Мөн тэдгээр нөхдийн контент үйлдвэрлэхэд ашиглах, компьютер, тоног төхөөрөмжийг байгууллагын төсвөөр худалдан авсан гэх мэтчилэн...

Захирлуудын зөвлөлтэйгөө зөвшилцөлгүй шийдвэр гаргаж, хууль бус шийдвэрүүдээ хэрэгжүүлэхийг шаарддаг шинэ захирлын ашиг сонирхлын зөрчил үүгээр хязгаарлагдахгүй. Товчхондоо “Монголын хөрөнгийн бирж” ХК-ийг улс төрийн карьер ахих шат дамжлага, улс төрийн ашиг хонжоо олох хэрэгсэл болгон ашиглах болжээ.

Тухайлбал, МХБ-ийн Сургалт, үйлчилгээ мэдээллийн танхимд НИТХ-ын ээлжит хурлыг хуралдуулахаар сэтгэжээ. Яармаг руу нүүсэн тус байгууллагын холбогдох ажилтнуудад яршиг төвөг удан, тоног төхөөрөмжийг нь зөөлгөн авчруулж, нэг өдрийн хурлыг биржид явуулсан байдаг ба энэ тухай мэдээ нь НИТХ-ын пэйж хуудас болон, өөрийнх нь сошиал сувагт “бахархалтайгаар” нийтлэгдсэн байна /https://www.facebook.com/share/p/1GA9Vgzgky/...