Засгийн газрын ээлжит хуралдаан өнөөдөр Төрийн ордонд эхэллээ. Энэ удаагийн хуралдаанаар эдийн засаг, нийгмийн чухал асуудлуудыг хэлэлцэж, холбогдох тогтоолын төслүүдийг хэлэлцэхээр төлөвлөсөн байна.

Тухайлбал, “Экспортыг нэмэгдүүлэх талаар авах зарим арга хэмжээний тухай”, “Засгийн газрын агентлагийн бүтэц, орон тооны талаар хэрэгжүүлэх зарим арга хэмжээний тухай”, “Үл хөдлөх хөрөнгө шилжүүлэх тухай” зэрэг тогтоолын төслүүдийг хэлэлцэнэ. Мөн УИХ-ын гишүүн О.Цогтгэрэлийн санаачилсан НӨАТ-ын тухай хуульд нэмэлт, өөрчлөлт оруулах тухай, УИХ-ын гишүүн О.Саранчулуун нарын санаачилсан Нийгмийн ажлын тухай хуулийн төсөлд Засгийн газраас өгөх санал, дүгнэлтийг хэлэлцэх юм.

Үүнээс гадна “Хүнс, хөдөө аж ахуйн салбарын 2025-2026 оны өвөлжилт, хаваржилтын бэлтгэл хангах зарим арга хэмжээний тухай” тогтоолын төслийг хэлэлцэхээр товложээ. Хуралдааны үеэр Гэмт хэргээс урьдчилан сэргийлэх ажлыг зохицуулах зөвлөлөөс 2021-2025 онд гэр бүлийн хүчирхийллээс урьдчилан сэргийлэх чиглэлээр хэрэгжүүлсэн ажлын тайлан, шинэ хичээлийн жилд бага ангид заах гадаад хэлний боловсрол, боловсролын цахим шилжилтийн талаар танилцуулга хийх юм.

Эх сурвалж: Засгийн газрын Хэвлэл мэдээлэл