Монгол Улс 2026 онд болох “Бэлчээр ба нүүдлийн мал аж ахуй эрхлэгчдийн олон улсын жил” болон НҮБ-ын Цөлжилттэй тэмцэх тухай конвенцын талуудын 17 дугаар бага хурлыг зохион байгуулах бэлтгэлээ хангаж байна.

Хүнс, хөдөө аж ахуй, хөнгөн үйлдвэрийн яамны Төрийн нарийн бичгийн дарга Т.Жамбалцэрэн Олон улсын газрын эвслийн захирал Марси Вигода тэргүүтэй төлөөлөгчдийг хүлээн авч уулзах үеэр Монгол Улсын мал аж ахуйн түүхэн уламжлал, бэлчээрийн газрын асар их нөөц боломжийг танилцууллаа. Нийт газар нутгийн 72.6 хувийг хөдөө аж ахуйн газар эзэлдэг бөгөөд үүний 97.6 хувь нь байгалийн бэлчээр, хадлангийн талбай юм. Улсын хэмжээнд 104 сая га бэлчээрийн газар бүртгэгдсэн нь хөдөө аж ахуйг тогтвортой хөгжүүлэх үндсэн суурь болж байна.

Тэрбээр Засгийн газраас хэрэгжүүлж буй “Хүнсний хувьсгал”, “Цагаан алт”, “Шинэ хоршоо-Чинээлэгч малчин”, “Атрын IV аян” зэрэг үндэсний хөтөлбөрүүдийн талаар танилцуулж, эдгээрийн зорилго нь малчид, тариаланчид, боловсруулах үйлдвэрүүдийг уялдаатай хөгжүүлж, хөдөө аж ахуйн түүхий эдийн тогтвортой хангамж, нэмүү өртөг шингэсэн үйлдвэрлэлийг дэмжихэд чиглэж буйг онцоллоо.

Мөн Монгол Улс уур амьсгалын өөрчлөлт, байгаль цаг уурын эрс тэс нөхцөлд дасан зохицсон хөдөө аж ахуйг хөгжүүлэхэд онцгой анхаарч, малчид болон хөдөөгийн иргэдийн амьжиргааг сайжруулахад чиглэсэн олон улсын хамтын ажиллагаанд нээлттэй гэдгээ илэрхийллээ.

Олон улсын газрын эвсэл нь дэлхийн 97 улсын 323 байгууллагыг эгнээндээ нэгтгэсэн бөгөөд газар, ус зэрэг нийтийн нөөцөд тэгш хүртээмжийг хангаж, өлсгөлөн, ядуурлыг бууруулахад чиглэсэн үйл ажиллагаа явуулдаг олон улсын байгууллага юм. Монгол Улс энэхүү байгууллагатай бүх талаар хамтран ажиллаж, 2026 онд болох олон улсын томоохон арга хэмжээнд идэвхтэй оролцохоор төлөвлөж байна.

Эх сурвалж: ХХААХҮЯ