Эдийн засгийн хөгжлийн зөвлөлийн хуралдаан энэ сарын 12-нд болж, Засгийн газрын үйл ажиллагаанд мэргэжлийн туслалцаа үзүүлэх, эдийн засгийн хөгжлийн бодлого боловсруулах, төр-хувийн хэвшлийн хамтын ажиллагааг уялдуулах асуудлыг хэлэлцэв.
Сангийн сайд Б.Жавхлан татварын шинэчлэлийн хэлэлцүүлгийн үр дүнг танилцуулахдаа 13 мянган иргэн, аж ахуйн нэгж, МҮХАҮТ, Монголын бизнесийн зөвлөл, татварын мэргэшсэн зөвлөх болон мэргэжлийн холбоодоос нийт 176 мянган санал авсны 50 гаруй хувийг хуулийн төсөлд тусгасан гэв. Ерөнхий сайд Г.Занданшатар баялаг бүтээгч, ажил олгогч, үйлдвэрлэгчдийн саналыг дахин нягтлах, НӨАТ-ын буцаан олголтыг үе шаттай нэмэгдүүлэх, татвар төлсөн нь хохирдог тогтолцоог арилгах шаардлагатайг онцлов.
Мөн хувийн хэвшлийн бизнесийн үйл ажиллагааг дэмжих, хуулиар хамгаалах үүднээс “Аж ахуйн үйл ажиллагааны эрх чөлөөний тухай” хуулийн төслийг боловсруулах нь зүйтэй гэж үзэв. Засгийн газар экспортыг нэмэгдүүлэх, худалдааг дэмжих, гаалийн хяналтын журамд өөрчлөлт оруулах ажлыг үргэлжлүүлэн хийж байгааг Ерөнхий сайд тэмдэглэлээ.
Эх сурвалж: Монголын Үндэсний Олон Нийтийн Радио Телевиз
