Монгол Улсын хүн амын гуравны нэг нь хүүхэд бөгөөд энэ нь ЭХЭМҮТ-ийн ачааллыг өндөр байлгадаг. Яаралтай тусламжийн тасаг сард 8-10 мянган хүүхдэд тусламж үзүүлдэг бол амбулаторийн хуучин барилга 38 жилийн насжилттай, 1100 м² талбайтай бөгөөд өдөрт 1200 орчим хүүхэд үйлчлүүлдэг. Үзлэгийн хүлээлт 10-20 хоног, мэс заслынх 90 хоногт хүрдэг.

Шинэ амбулаторийн барилга хуучнаасаа 8 дахин том, 95 кабинеттэй, өдрийн эмчилгээ, 37 төрлийн шинжилгээ, таван өдрийн мэс заслын өрөөтэй бөгөөд ашиглалтад орсноор үзлэгийн хүлээлт 5 хоног, мэс заслынх 40 хоног болж буурна гэж үзэж байна.

Ерөнхий сайд байгууллагын дотоод зохион байгуулалтыг сайжруулж, үйлчилгээг нэг цэгээс үзүүлэхийг онцлон тэмдэглэв. ЭХЭМҮТ-ийн тавьсан төсвийн дутагдал, тоног төхөөрөмжийн зардлыг энэ долоо хоногийн Засгийн газрын хуралдаанаар хэлэлцэнэ.

Мөн 7 настай охины хэнгэрэг нөхөх хагалгаа санхүүжилт дууссаны улмаас хойшлогдсон асуудлыг газар дээр нь шийдвэрлэж, хүүхдийн архаг өвчний мэс заслын санхүүжилтийн хязгаарлалтыг ирэх он гэхэд хүүхдэд ээлтэй байдлаар өөрчлөхөөр боллоо.

Эх сурвалж: Засгийн газрын хэвлэл мэдээлэл, олон нийттэй харилцах газар