Их Британи, Австрали, Франц, Испани, Япон зэрэг 24 улсын Гадаад хэргийн сайд нар мягмар гарагт хамтарсан мэдэгдэл гаргаж, Газын зурвас дахь хүмүүнлэгийн хямрал төсөөлөхийн аргагүй ноцтой хэмжээнд хүрсэн тул тусламжийг саадгүй нэвтрүүлэх шаардлагатайг онцоллоо. Тэд олон улсын төрийн бус байгууллагуудын тусламжийн бүх тээвэрлэлтийг зөвшөөрч, хүмүүнлэгийн ажилтнуудын үйл ажиллагааг тасалдалгүй явуулах нөхцөлийг бүрдүүлэхийг Израилд уриалав.
Израилын тал долоодугаар сарын сүүлчээр аюулгүй чиглэлүүдийг гаргасан ч хүнсний хомсдол үргэлжилж байна. Газын эрүүл мэндийн байгууллагуудын мэдээллээр, мягмар гарагийн байдлаар 227 хүн, түүний дотор 103 хүүхэд хоол тэжээлийн дутагдлаас болж нас баржээ. Мөн тусламж түгээх газруудын ойролцоо байсан 1800 гаруй хүн Израилын цэргүүдийн галт зэвсэгт өртөн амиа алдсан талаар орон нутгийн албаныхан мэдээлсэн байна.
Мэдэгдэлд тусламжийг хуурай замаар саадгүй оруулахын тулд гал зогсоох шаардлагатайг онцолсон ч Израил Палестины нутаг дэвсгэрт цэргийн ажиллагаагаа өргөжүүлэхээр төлөвлөж байгаа тул хүмүүнлэгийн нөхцөл цаашид улам дордох төлөвтэй байна.
Эх сурвалж: NHK
